கிணற்றில் பெயிண்டர் பிணம்-போலீசார் விசாரணை

ஆம்பூர்

ஆம்பூர் அருகே கிணற்றில் பெயிண்டர் பிணமாக கிடந்தது குறித்து போலீசார் விசாரணை நடத்தி வருகின்றனர்.

ஆம்பூரை அடுத்த வடச்சேரி பகுதியில் உள்ள ஒரு கிணற்றில் ஆண் பிணம் மிதப்பதாக போலீசாருக்கு தகவல் கிடைத்தது. இதனையடுத்து சம்பவ இடத்திற்கு விரைந்து சென்ற உமராபாத் போலீசார் மற்றும் தீயணைப்பு துறையினர் கிணற்றிலிருந்து பிணத்தை மீட்டு விசாரித்தனர்.

இதில் பிணமாக கிடந்தவர் வாணியம்பாடியை அடுத்த வெங்கடாபுரம் பகுதியை சேர்ந்த ராமமூர்த்தி மகன் பெயிண்டர் சத்யராஜ் (வயது 35) என்பது தெரிய வந்தது. இவருக்கு திருமணமாகி 2 பெண் குழந்தைகள் உள்ளனர். பின்னர் சத்யராஜ் உடலை பிரேத பரிசோதனைக்காக ஆம்பூர் அரசு மருத்துவமனைக்கு ேபாலீசார் கொண்டு சென்றனர். சத்யராஜ் கிணற்றில் தவறி விழுந்து இறந்தாரா அல்லது வேறு ஏதாவது காரணமா என்பது குறித்து போலீசார் தொடர்ந்து விசாரணை நடத்தி வருகின்றனர்.