திருவந்திபுரத்தில் இருதரப்பினர் மோதல்; 3 பேர் கைது தண்ணீர் பந்தலில் வைத்திருந்த டம்ளரில் மது அருந்தியதால் தகராறு

கடலூர் திருவந்திபுரம் அருகே சாலக்கரை மாரியம்மன் கோவில் திருவிழாவையொட்டி சம்பவத்தன்று தெருக்கூத்து நடைபெற்றது. அப்போது அங்கு வந்த திருவந்திபுரம் சன்னியாசி தோட்டம் பகுதியை சேர்ந்த அய்யனார் (வயது 55) என்பவர், அங்கிருந்த தண்ணீர் பந்தலில் வைக்கப்பட்டிருந்த டம்ளரை எடுத்து மது அருந்தியதாக கூறப்படுகிறது.

இதை பார்த்த சாலக்கரையை சேர்ந்த தேவநாதன் மகன் பாலா என்கிற பூபாலன் (23), ராதா மகன் ரஞ்சித் (24) ஆகியோர் தட்டிக் கேட்டதாக தெரிகிறது. இதில் அவர்களுக்குள் தகராறு ஏற்பட்டது.

அப்போது இருதரப்பினரும் ஒருவரையொருவர் திட்டி தாக்கிக் கொண்டனர். இதுதொடர்பாக இருதரப்பினரும் திருப்பாதிரிப்புலியூர் போலீஸ் நிலையத்தில் தனித்தனியாக புகார் கொடுத்தனர். அதன் பேரில் இருதரப்பை சேர்ந்த 4 பேர் மீது போலீசார் வழக்குப்பதிவு செய்து பாலா, ரஞ்சித், அய்யனார் ஆகியோரை கைது செய்தனர்.