கேரளா, கர்நாடகா, தெலுங்கானா அணிகள்

அகில இந்திய அளவிலான கூடைப்பந்து அரை இறுதி போட்டியில் கேரளா, கர்நாடகா, தெலுங்கானா அணிகள் இன்று காலையில் மோதுகின்றன. மாலையில் இறுதிப்போட்டி நடைபெறுகிறது.

கூடைப்பந்து போட்டி

தமிழக முதல்-அமைச்சர் மு.க.ஸ்டாலின் 70-வது பிறந்தநாளையொட்டி, தி.மு.க. விளையாட்டு மேம்பாட்டு அணி சார்பில் சேலம் காந்தி விளையாட்டு மைதானம் உள்விளையாட்டு அரங்கில் அகில இந்திய அளவில் பெண்களுக்கான கூடைப்பந்து போட்டி நடைபெற்று வருகிறது. இதில், தமிழ்நாடு, கேரளா உள்பட 8 மாநில அணிகள் கலந்து கொண்டு விளையாடுகின்றன.

3-வது நாளாக நேற்று மாலை நடந்த முதல் போட்டியில் சத்தீஷ்கார் சாய் அணியும், பெங்களூரு ஜெயின் பல்கலைக்கழக அணியும் மோதின. முடிவில், 20-30, 47-59 என்ற செட் கணக்கில் பெங்களூரு ஜெயின் பல்கலைக்கழக அணி வெற்றி பெற்றது.

தொடர்ந்து நடந்த 2-வது போட்டியில் தெலுங்கானா சவுத் சென்டிரல் ரெயில்வே அணியும், கேரள காவல்துறை அணியும் மோதின. முடிவில், 41-23, 64-47 என்ற செட் கணக்கில் தெலுங்கானா சவுத் சென்டிரல் ரெயில்வே அணி வெற்றி பெற்றது.

இதையடுத்து 3-வது நடந்த ஆட்டத்தில் தமிழ்நாடு ரைசிங் ஸ்டார் அணியை கேரள மின்சார வாரியம் அணி தோற்கடித்து வெற்றி பெற்றது. அதன்பிறகு நடந்த 4-வது போட்டியில் மராட்டியம் ஐ.டி.எம் .பல்கலைக்கழக அணியை தோற்கடித்து தமிழ்நாடு கூடைப்பந்து கழகம் அணி வென்றது.

அரையிறுதிக்கு தகுதி

இதையடுத்து லீக் சுற்றுகள் முடிவில் முதல் 4 இடங்களை பிடித்த தெலுங்கானா சவுத் சென்டிரல் ரெயில்வே, பெங்களூரு ஜெயின் பல்கலைக்கழகம், கேரளா மின்வாரியம் மற்றும் கேரளா காவல்துறை ஆகிய 4 அணிகள் அரையிறுதிப்போட்டிக்கு தகுதி பெற்றன. இன்று (ஞாயிற்றுக்கிழமை) காலை 6.30 மணிக்கு நடக்கும் முதல் அரையிறுதி போட்டியில் தெலுங்கானா சவுத் சென்டிரல் ரெயில்வே அணியும், பெங்களூரு ஜெயின் பல்கலைக்கழக அணியும் மோதுகின்றன. அடுத்து நடக்கும் 2-வது அரையிறுதி போட்டியில் கேரளா மின்வாரிய அணியும், கேரளா காவல்துறை அணியும் மோதுகின்றன.

பிற்பகல் 2.30 மணிக்கு 3-ம் பரிசு இடத்துக்கான போட்டியும், அதனை தொடர்ந்து மாலை 4 மணிக்கு இறுதிப்போட்டியும் நடக்கிறது. நிறைவாக பரிசளிப்பு விழா நடக்கிறது.