மாவட்ட மைய நூலகத்தில் அடிப்படை வசதிகளை மேம்படுத்த வேண்டும்

திருவாரூர் மாவட்ட மைய நூலகத்தில் அடிப்படை வசதிகளை மேம்படுத்த வேண்டும் என வாசகர்கள் கோரிக்கை விடுத்துள்ளனர்.

மாவட்ட மைய நூலகம்

திருவாரூர் நாகை பைபாஸ் சாலையில் மாவட்ட மைய நூலகம் செயல்பட்டு வருகிறது. இந்த நூலகத்தில் 1 லட்சத்திற்கு மேற்பட்ட புத்தகங்கள் உள்ளன. இந்த நூலகத்தில் தினமும் நூற்றுகணக்கானோர் வந்து செல்கின்றனர். குறிப்பாக போட்டி தேர்வு எழுதும் மாணவ-மாணவிகள் அதிகமாக நூலகத்தை பயன்படுத்தி வருகின்றனர்.

சேதமடைந்த சாலை

இந்த நூலகத்திற்கு செல்லும் தார்ச்சாலை மிகவும் சேதமடைந்து காணப்படுகிறது. சாலையில் ஜல்லி கற்கள் பெயர்ந்து குண்டும், குழியுமாக காணப்படுகிறது. இந்த சாலையில் செல்லும் வாகன ஓட்டிகள் அவதி அடைந்து வருகின்றனர்.

மேலும் நூலகத்தை சுற்றி சுற்றுச்சுவர் இல்லாததால் ஆடு, மாடு, பன்றிகள் உள்ள புகுந்து விடுகின்றன. எனவே சம்பந்தப்பட்ட அதிகாரிகள் நூலகத்துக்கு செல்லும் சாலையை சீரமைக்க வேண்டும்.

அடிப்படை வசதிகள்

நூலகத்திற்கு சுற்றுச்சுவர் அமைக்க வேண்டும். மேலும் சாலை இருபுறங்களிலும் மின் விளக்கு வசதி உள்ளிட்ட அடிப்படை வசதிகள் மேம்படுத்தி தர வேண்டும் என வாசகர்கள் மற்றும் பொதுமக்கள் கோரிக்கை விடுத்துள்ளனர்.