கழுகுகளை பாதுகாக்க மாணவர்களுக்கு விழிப்புணர்வு

கூடலூர், 

மசினகுடி, சீகூர் வனப்பகுதியில் கழுகுகள் பாதுகாப்பது குறித்து மாணவர்களுக்கு விழிப்புணர்வு ஏற்படுத்தப்பட்டது.

கழுகுகள் தினம்

முதுமலை புலிகள் காப்பக கள இயக்குநர் வெங்கடேஷ், மசினகுடி கோட்ட துணை இயக்குநர் அருண்குமார் உத்தரவின்படி, மசினகுடியில் உலக பாறு கழுகுகள் தினம் கொண்டாடப்பட்டது. இதற்கு மசினகுடி வனச்சரகர் பாலாஜி தலைமை தாங்கினார். இதில் பள்ளி மாணவ-மாணவிகள், நீலகிரி மாவட்ட மருந்து விற்பனையாளர் சங்க பிரதிநிதிகள் மற்றும் தன்னார்வ அமைப்பு பிரதிநிதிகள் ஆகியோர் கலந்துகொண்டனர்.

சீகூர் வனச்சரகத்தில் உள்ள ஜகலிக்கடவு பகுதியில் உலக பாறு கழுகுகள் தினம் கொண்டாடப்பட்டது. நிகழ்ச்சிக்கு வனச்சரகர் ஜான் பீட்டர் தலைமை தாங்கினார். பின்னர் பள்ளி மாணவ-மாணவிகளுக்கு பாறு கழுகுகள் குறித்த விழிப்புணர்வு ஏற்படுத்தப்பட்டது. தொடர்ந்து பாறு கழுகுகள் கூடு கட்டும் பருவத்தை வரவேற்கும் விதமாக பொங்கல் வைக்கப்பட்டது. பின்னர் பள்ளி மாணவர்களுக்கு படம் வரைதல் மற்றும் பரமபதம் விளையாட்டு மூலம் பாறு கழுகுகள் குறித்த விழிப்புணர்வு போட்டிகள் நடைபெற்றது.

வனத்தின் தூய்மை காவலன்

அப்போது வனத்துறையினர் கூறியதாவது:-

வனம், வனவிலங்குகளை பாதுகாத்தால் சுற்றுச்சூழல் மேம்படும். இதன் மூலம் மனித இனம் பாதுகாக்கப்படும். வனத்தின் தூய்மை காவலன் என அழைக்கப்படும் அழிவின் பட்டியலில் பாறு கழுகுகள் உள்ளது. புலி, செந்நாய்கள், சிறுத்தை புலிகள் உள்ளிட்ட மாமிச உண்ணிகள் சாப்பிட்டு விட்டு வனத்தில் விட்டு செல்லும் இறைச்சி கழிவுகளை கழுகுகள் தின்று வனத்தை தூய்மைப்படுத்துகிறது.

ரசாயன உரங்களின் பயன்பாட்டால் கழுகுகள் அழிந்து வருகின்றன. இதை தடுக்க நாம் அனைவரும் ஒன்றிணைய வேண்டும். இவ்வாறு அவர்கள் கூறினர். இறுதியாக பாறு கழுகுகளை காக்க உறுதிமொழி எடுக்கப்பட்டது. அப்போது மருந்து விற்பனை சங்க பிரதிநிதிகள் பாறு கழுகுகளை காக்க ஒத்துழைப்பு தருவதாகவும் தெரிவித்தனர். நிகழ்ச்சியில் வனவர்கள் சித்தராஜ், ஸ்ரீராம், வன காப்பாளர்கள் ஆன்டனி, சிவக்குமார், அண்ணாதுரை மற்றும் உயிரின ஆர்வலர்கள் கலந்துகொண்டனர்.