போலீஸ் சப்-இன்ஸ்பெக்டர் வீட்டில் கொள்ளை முயற்சி

வள்ளியூர்:

வள்ளியூர் நல்ல சமாரியன் நகரைச் சேர்ந்தவர் மணிகண்டன் (வயது 62). ஓய்வு பெற்ற போலீஸ் சப்-இன்ஸ்பெக்டர். இவர் வீட்டின் கீழ் பகுதியில் வசித்து வருகிறார். மாடியை வாடகைக்கு விட்டுள்ளார். இந்த நிலையில் மணிகண்டன் தனது குடும்பத்தினருடன் கடந்த 2 நாட்களுக்கு முன்பு கேரளாவுக்கு சென்று விட்டார். இதனால் வீட்டில் ஆட்கள் இல்லை. இதை அறிந்த மர்மநபர்கள் நேற்று முன்தினம் இரவு கதவை உடைத்துள்ளனர். அப்போது சத்தம் கேட்டு மாடியில் இருந்தவர்கள் மின்விளக்கை ஆன் செய்து பார்த்தனர். அப்போது, மர்ம நபர்கள் தப்பி ஓடியது தெரியவந்தது. இதுகுறித்து வள்ளியூர் போலீசாருக்கு தகவல் தெரிவிக்கப்பட்டது. அதன்பேரில் சம்பவ இடத்திற்கு போலீசார் சென்று விசாரணை மேற்கொண்டனர். மணிகண்டன் அளித்த புகாரின் பேரில் வள்ளியூர் போலீசார் வழக்குப்பதிவு செய்து மர்மநபர்களை வலைவீசி தேடி வருகிறார்கள்.