கோவில் விழாவில் போலீஸ்காரர் மீது தாக்குதல்-வாலிபர் கைது

திருவேங்கடம்:

திருவேங்கடம் அடுத்துள்ள வடக்கு பாறைப்பட்டி கிராமத்தை சேர்ந்தவர் ராஜேந்திரகுமார் (வயது 28). இவர் கோவில்பட்டியில் உள்ள காவல் நிலையத்தில் போலீஸ்காரராக உள்ளார். சம்பவத்தன்று ஊரில் நடைபெறும் கோவில் திருவிழாவுக்காக ராஜேந்திரகுமார் வந்தார்.

இவருக்கும், அதே ஊரை சேர்ந்த கிருஷ்ணசாமி மகன்கள் கவியரசன் (26) கண்ணதாசன் ஆகியோருக்கும் இடையே ஏற்கனவே முன்விரோதம் இருந்து வந்ததாக கூறப்படுகிறது.

கோவில் திருவிழாவில் வைத்து அவர்களுக்குள் மீண்டும் வாக்குவாதம் ஏற்பட்டது. இதில் கவியரசன், கண்ணதாசன் சேர்ந்து ராஜேந்திரகுமாரை தாக்கியதாக கூறப்படுகிறது. இதில் காயமடைந்த அவர் சங்கரன்கோவில் அரசு மருத்துவமனையில் சிகிச்சைக்காக சேர்க்கப்பட்டார். இது குறித்த புகாரின் பேரில் திருவேங்கடம் போலீஸ் சப்-இன்ஸ்பெக்டர் தாமரைலிங்கம் வழக்குப்பதிவு செய்து கவியரசனை கைது செய்தார். கண்ணதாசனை வலைவீசி தேடி வருகின்றனர்.