ஈரோட்டில் ஆசிரியர் வீட்டில் நகை, பணம் திருட்டு

ஈரோட்டில் ஆசிரியர் வீட்டில் நகை, பணத்தை திருடிய மர்மநபர்களை போலீசார் வலைவீசி தேடி வருகின்றனர்.

திருட்டு

ஈரோடு கொல்லம்பாளையம் வீட்டுவசதி வாரிய பகுதியை சேர்ந்தவர் ஜேம்ஸ் சாசே ஸ்பென்சர் (வயது 48). இவர் ஈரோடு கருங்கல்பாளையத்தில் உள்ள காமராஜர் மாநகராட்சி மேல்நிலை பள்ளிக்கூடத்தில் ஆசிரியராக பணியாற்றி வருகிறார். இவர் கடந்த 21-ந் தேதி தனது குடும்பத்துடன் வெளியூருக்கு சென்றார். நேற்று காலை அவர் வீடு திரும்பினார். அப்போது வீட்டின் கதவு உடைக்கப்பட்டு கிடந்ததை பார்த்து அவர் அதிர்ச்சி அடைந்தார்.

வீட்டுக்குள் சென்று பார்த்தபோது பீரோ திறக்கப்பட்டு பொருட்கள் சிதறி கிடந்தன. மேலும், பீரோவில் வைக்கப்பட்டு இருந்த 2½ பவுன் நகையும், ரூ.40 ஆயிரமும் திருட்டுபோய் இருந்தது தெரியவந்தது.

வலைவீச்சு

இதுகுறித்து ஈரோடு சூரம்பட்டி போலீசாருக்கு தகவல் கொடுக்கப்பட்டது. அதன்பேரில் போலீசார் சம்பவ இடத்துக்கு சென்று விசாரணை நடத்தினர். மேலும் தடயவியல் நிபுணர்கள் வரவழைக்கப்பட்டு வீட்டில் பதிவான கைரேகைகளை சேகரித்தனர்.

இந்த சம்பவம் தொடர்பாக சூரம்பட்டி போலீசார் வழக்குப்பதிவு செய்து, வீடு புகுந்து நகை, பணத்தை திருடிய மர்மநபர்களை வலைவீசி தேடி வருகின்றனர்.