பஞ்சலிங்க அருவியில் குவிந்த சுற்றுலா பயணிகள்

கோடைவிடுமுறையையொட்டி பஞ்சலிங்க அருவியில் குளிக்க சுற்றுலா பயணிகள் குவிந்தனர்.

பஞ்சலிங்க அருவி

உடுமலையை அடுத்த திருமூர்த்திமலையில் பஞ்சலிங்க அருவி உள்ளது. உடுமலை வனச்சரகத்தின் அடர்ந்த வனப்பகுதியில் உள்ள இந்த அருவிக்கு மேல் குருமலை, கீழ்குருமலை, குழிப்பட்டி பகுதியில் உற்பத்தியாகின்ற கொட்டையாறு, பாரப்பட்டியாறு, குருமலைஆறு, கிழவிப்பட்டிஆறு, உப்புமண்ணபட்டிஆறு, பாலாறு, உழுவியாறு உள்ளிட்டவை நீராதாரமாக உள்ளது. வனப்பகுதியில் மழைப்பொழிவு ஏற்படும்போது ஆறுகளில் நீர்வரத்தை பெறுகிறது.

வனப்பகுதியில் பல்வேறு பகுதியில் ஓடிவருகின்ற ஆறுகள் பஞ்சலிங்கங்களுக்கு அருகில் ஒன்று சேர்ந்து அருவியாக கொட்டுகிறது. அருவியில் விழுகின்ற மூலிகை தண்ணீரில் குளித்து புத்துணர்வு பெறுவதற்காக வெளிமாவட்டங்கள் மற்றும் வெளி மாநிலங்களில் இருந்து ஏராளமான சுற்றுலா பயணிகள் நாள்தோறும் திருமூர்த்திமலைக்கு வருகை தருகின்றனர்.

கோடை விடுமுறை

இந்த நிலையில் வனப்பகுதியில் கடந்த சில மாதங்களாக வெப்பத்தின் தாக்குதல் அதிகரித்து காணப்பட்டது. இதன் காரணமாக அருவியின் நீராதாரங்களில் நீர்வரத்து குறைந்ததால் பஞ்சலிங்க அருவியிலும் நீர்வரத்து குறைந்தது. இந்த சூழலில் அருவியின் நீர்ப்பிடிப்பு பகுதியில் கடந்த மாதம் இறுதியில் திடீரென மழை பெய்தது. இதன் காரணமாக அருவிக்கு நீர்வரத்து அதிகரித்தது.

அதைத்தொடர்ந்து கோடை விடுமுறையை களிக்க வந்த சுற்றுலாப் பயணிகள் உற்சாகத்தோடு குடும்பம் குடும்பமாக அருவியில் குளித்து வந்தனர். இதனால் நாள்தோறும் சுற்றுலா பயணிகள் கூட்டம் கணிசமான அளவில் இருந்து வந்தது. ஆனால் மழை பொழிவதற்கு இன்னும் வெப்பத்தின் தாக்குதல் அதிகரித்தது.

சுற்றுலா பயணிகள் குவிந்தனர்

இதனால் அருவிக்கு வந்து கொண்டுள்ள தண்ணீர் படிப்படியாக குறைந்து வந்தது. இந்த நிலையில் நேற்று வார விடுமுறையை முன்னிட்டு ஏராளமான சுற்றுலா பயணிகள் திருமூர்த்தி மலைக்கு வருகை தந்தனர். பின்னர் அருவியில் குளிப்பதற்காக சென்றனர். ஆனால் அருவியில் குறைவான அளவு நீர்வரத்து இருந்ததால் வரிசையில் நின்று குளித்து மகிழ்ந்தனர்.

அதைத் தொடர்ந்து அடிவாரப் பகுதிக்கு வந்த சுற்றுலாப் பயணிகள் மும்மூர்த்திகளை சாமி தரிசனம் செய்து விட்டு திரும்பிச் சென்றனர். இதனால் பஞ்சலிங்க அருவி, கோவில், அணைப்பகுதியில் சுற்றுலா பயணிகள் கூட்டம் அதிகளவில் காணப்பட்டது.