சேலம் புதிய பஸ் நிலையத்தில் மின் தடையின் போது இளம் பெண்ணிடம் சில்மிஷம்; வாலிபர் கைது

இளம்பெண் சில்மிஷம்

சேலம் கோரிமேட்டை சேர்ந்த 25 வயதுடைய இளம்பெண் ஒருவர் மதுரையில் இருந்து சேலம் புதிய பஸ் நிலையத்துக்கு பஸ்சில் வந்தார். அப்போது அவரை வீட்டுக்கு அழைத்து செல்வதற்காக அவருடைய தம்பி புதிய பஸ் நிலையம் வந்தார். பின்னர் அவர்கள் இருவரும் பஸ் நிலையத்துக்குள் நடந்து சென்றனர்.

இந்த நேரத்தில் அங்கு திடீரென மின்சாரம் தடை செய்யப்பட்டது. அப்போது அங்கு வந்த வாலிபர் ஒருவர் ஆபாச வார்த்தைகளால் பேசியதுடன் அந்த இளம்பெண்ணிடம் சில்மிஷத்தில் ஈடுபட்டதாக கூறப்படுகிறது. இதனால் அந்த பெண் சத்தம் போட்டு கூச்சலிட்டார். இதனிடையே தடை செய்யப்பட்ட மின்சாரமும் வந்ததால் அங்கிருந்த பொதுமக்கள் இளம்பெண்ணிடம் சில்மிஷம் செய்த வாலிபரை கையும், களவுமாக பிடித்தனர்.

கைது

இதையடுத்து அவர்கள் அந்த வாலிபரை பள்ளப்பட்டி போலீஸ் நிலையத்தில் ஒப்படைத்தனர். போலீசார் விசாரணையில் அவர், ஓமலூர் அருகே உள்ள டேனீஸ்பேட்டையை சேர்ந்த முகமது சோகைல் (வயது 27) என்பது தெரியவந்தது. அதைத்தொடர்ந்து அவரை போலீசார் கைது செய்து விசாரணை நடத்தி வருகின்றனர். இந்த சம்பவம் அந்த பகுதியில் பரபரப்பை ஏற்படுத்தியது.