காரில் ரேஷன் அரிசி கடத்தல்; 2 பேர் கைது

எடப்பாடி:

பூலாம்பட்டி பகுதியில் ரேஷன் அரிசி கடத்தப்படுவதாக போலீசாருக்கு ரகசிய தகவல் கிடைத்தது. இதையடுத்து சப்-இன்ஸ்பெக்டர் அமிர்தலிங்கம் தலைமையில் போலீசார் பூலாம்பட்டி பகுதியில் தீவிர வாகன சோதனையில் ஈடுபட்டனர். அப்போது அந்த வழியாக வந்த காரை நிறுத்தி சோதனையிட்டனர். இதில் காரில் 1 டன் ரேஷன் அரிசி கடத்தப்படுவதை போலீசார் கண்டுபிடித்தனர். இதையடுத்து ரேஷன் அரிசி மற்றும் காரை பறிமுதல் செய்த போலீசார், காரில் வந்த 2 பேரிடம் விசாரணை நடத்தினர். அவர்கள் சங்ககிரி அடுத்த சின்னமாகவுண்டனூர் பகுதியை சார்ந்த ராமச்சந்திரன் மகன் சீனிவாசன் (வயது 28) மற்றும் பவானி திருவள்ளுவர் நகரை சேர்ந்த சண்முகம் மகன் மணிகண்டன் (36) என்பது தெரியவந்தது. பின்னர் அவர்கள் இருவரையும் போலீசார் கைது செய்தனர்.