ராமநாதபுரம் மாவட்ட விவசாயிகளுக்கு நிவாரணத்தொகை வழங்க ஏற்பாடு

பரமக்குடி, 

பரமக்குடியில் முருகேசன் எம்.எல்.ஏ. நிருபர்களிடம் கூறியதாவது:- மறைந்த முன்னாள் தி.மு.க. தலைவர் கருணாநிதி முதல்-அமைச்சராக இருந்த போது ரூ.616 கோடியில் ராமநாதபுரம் மாவட்ட மக்களின் குடிநீர் தட்டுப்பாட்டையும், குடிநீர் தாகத்தை தீர்க்க காவிரி கூட்டுக் குடிநீர் திட்டம் செயல்படுத்தப்பட்டது. அந்தத் திட்டம் குறிப்பிட்ட காலத்திற்குள் முடிக்கப்பட்டு இந்த மாவட்ட மக்களுக்காக அர்ப்பணிக்கப்பட்டது. தி.முக. ஆட்சியில் கொண்டுவரப்பட்ட அந்த காவிரி கூட்டுக் குடிநீர் திட்டத்தால் ராமநாதபுரம் மாவட்டத்தில் குடிநீர் தட்டுப்பாடே இல்லை என்ற நிலை ஏற்பட்டுள்ளது. பரமக்குடியில் முதல் முதலாக அரசு கல்லூரியை ஏற்படுத்தியது தி.மு.க. ஆட்சியில் தான். தற்போதும் தமிழக முதல்-அமைச்சர் மு.க.ஸ்டாலின் பல்வேறு திட்டங்களை செயல்படுத்தி வருகிறார். பருவமழை பெய்யாததால் ராமநாதபுரம் மாவட்டத்தில் நெற்பெயர்கள் கருகி விவசாயிகள் பாதிக்கப்பட்டுள்ளனர்.இது குறித்து குழு பார்வையிட்டு சென்று அறிக்கை சமர்ப்பித்துள்ளது. பாதிக்கப்பட்ட விவசாயிகளுக்கு கண்டிப்பாக நிவாரணத்தொகை வழங்கப்படும். அதற்கான நடவடிக்கை மேற்கொள்ளப்பட்டு வருகிறது. இது குறித்து ராமநாதபுரம் மாவட்ட கலெக்டர் ஜானிடாம் வர்கீஸ்சை நேரில் சந்தித்து வலியுறுத்தி உள்ளோம். இதுகுறித்து அறிக்கையினை அவர் தமிழக அரசுக்கும் முதல்-அமைச்சருக்கும் அனுப்பி உள்ளார். பாதிக்கப்பட்ட விவசாயிகளுக்கு நிவாரணத் தொகை வழங்க நடவடிக்கை மேற்கொள்ளப்பட்டு வருகிறது. கண்டிப்பாக நிவாரணத் தொகை வழங்கப்படும். இவ்வாறு அவர் கூறினார்.