கியாஸ் கசிவால் தீப்பிடித்து முதியவர் பலி

சாத்தூர், 

விருதுநகர் மாவட்டம் சாத்தூரை சேர்ந்தவர் சிவசாமி (வயது 61). இவர் மெயின்ரோடு பகுதியில் உள்ள வீட்டில் தனியாக வசித்து வருகிறார். இந்தநிலையில் அதிகாலையில் வீட்டில் சமையல் சிலிண்டரில் கசிவு ஏற்பட்டுள்ளது. இதை அறியாமல் சிவசாமி அடுப்பை பற்ற வைத்துள்ளார். இதில் தீவிபத்து ஏற்பட்டதாக கூறப்படுகிறது. இதுகுறித்து தகவல் அறிந்த தீயணைப்பு துறையினர் விரைந்து வந்து தீயை அணைத்தனர். இருப்பினும் இந்த தீவிபத்தில் சிவசாமி உடல் கருகி சம்பவ இடத்திலேயே உயிரிழந்தார். இதுகுறித்து தகவல் அறிந்த சாத்தூர் நகர் போலீசார், விரைந்து வந்து சிவசாமியின் உடலை மீட்டு சாத்தூர் அரசு மருத்துவமனைக்கு பரிசோதனைக்காக அனுப்பி வைத்தனர். தொடர்ந்து இந்த சம்பவம் குறித்து போலீசார் விசாரணை நடத்தி வருகின்றனர்.