கல்வராயன்மலையில் மோட்டார் சைக்கிளில் சாராயம் கடத்திய வாலிபர் கைது

கச்சிராயப்பாளையம்,

கல்வராயன்மலை கரியாலூர் போலீஸ் சப்-இன்ஸ்பெக்டர் சேகர் தலைமையிலான போலீசார் சேராப்பட்டு-கல்லாத்திபாறை சாலையில் வாகன சோதனையில் ஈடுபட்டனர். அப்போது அந்த வழியாக சாக்கு மூட்டைகளுடன் மோட்டார் சைக்கிளில் வந்த வாலிபரை தடுத்து நிறுத்தி, மூட்டைகளை பிரித்து சோதனை நடத்தினர். அப்போது மூட்டைகளுக்குள் 2 லாரி டியூப்களில் 110 லிட்டர் சாராயம் கடத்தி வந்தது கண்டுபிடிக்கப்பட்டது. இதையடுத்து மோட்டார் சைக்கிளை ஓட்டி வந்தவரிடம் நடத்திய விசாரணையில், அவர் குரும்பாலூர் கிராமத்தை சேர்ந்த வெள்ளையன் மகன் செல்வமணி(வயது 23) என்பதும், மோட்டார் சைக்கிளில் சாராயத்தை கடத்தி வந்தபோது சிக்கியதும் தெரியவந்தது. அதைத்தொடர்ந்து செல்வமணியை போலீசார் கைது செய்ததுடன், சாராயம் மற்றும் அதனை கடத்த பயன்படுத்தப்பட்ட மோட்டார் சைக்கிள் ஆகியவற்றையும் பறிமுதல் செய்தனர்.