பள்ளிக்கு சென்றபோது அரசு பஸ் மோதி மாணவன் படுகாயம்

திருவெறும்பூர்:

திருவெறும்பூர் அருகே உள்ள காட்டூர் கைலாசநாதர் இரண்டாவது தெருவை சேர்ந்தவர் தாமோதரன். இவரது மகன் கனிஷ்கர்(வயது 10). இவன் காட்டூரில் உள்ள ஒரு தனியார் பள்ளியில் 5-ம் வகுப்பு படித்து வருகிறான். இவனது தங்கையும் அதே பள்ளியில் படித்து வருகிறாள். இந்நிலையில் நேற்று காலை பள்ளிக்கு செல்வதற்காக கனிஷ்கர் மற்றும் அவனது தங்கையை பாட்டி அழைத்து வந்தார். திருச்சி-தஞ்சை தேசிய நெடுஞ்சாலையை கடந்தபோது கனிஷ்கர் மீது கும்பகோணத்தில் இருந்து குமுளி நோக்கிச்சென்ற அரசு பஸ் மோதியது.

இதில் பலத்த காயமடைந்த கனிஷ்கரை அக்கம் பக்கத்தினர் மீட்டு திருச்சியில் உள்ள ஒரு தனியார் மருத்துவமனையில் சிகிச்சைக்காக சேர்த்தனர். இது பற்றி தகவல் அறிந்த திருவெறும்பூர் போலீசார் சம்பவ இடத்திற்கு விரைந்து வந்து விசாரணை நடத்தினர். மேலும் இது குறித்து வழக்குப்பதிவு செய்து விசாரணை நடத்தி வருகின்றனர். இச்சம்பவம் திருவெறும்பூர் பகுதியில் பரபரப்பை ஏற்படுத்தியது.