மான் வேட்டையாடியவருக்கு ரூ.25 ஆயிரம் அபராதம்

கடையநல்லூர்:

கடையநல்லூர் அருகே பண்பொழி பீட் பண்பொழி திருமலை கோவில் மலையடிவாரத்தில் நேற்று முன்தினம் இரவு கடையநல்லூர் வனச்சரக அலுவலர் சுரேஷ் ஆலோசனையின் பேரில் மேக்கரை பிரிவு வனவர் அம்பலவாணன், கடையநல்லூர் வனவர் முருகேசன் மற்றும் சிறப்பு பணி வனவர் ரவிந்திரன், வனக் காப்பாளர்கள், வேட்டை தடுப்பு காவலர்கள் அடங்கிய தனிக்குழுவினர் ரோந்து பணியில் ஈடுபட்டனர்.

அப்போது பண்பொழி மலையடிவார பகுதியைச் சேர்ந்த முருகையா மகன் பரமசிவன் (வயது 38) என்பவர் வேட்டை நாயின் மூலம் மான், முயல் மற்றும் வன விலங்குகளை வேட்டையாடிய குற்றத்திற்காக கைது செய்தனர். பின்னர் மாவட்ட வன அலுவலர் முருகன் உத்தரவின் பேரில் வன உயிரின பாதுகாப்பு சட்டத்தின் படி அவருக்கு ரூ.25 ஆயிரம் அபராதம் விதித்து எச்சரிக்கை செய்து அனுப்பினர்.