சென்னை விமான நிலையத்தில் ரூ.46.24 லட்சம் மதிப்பிலான தங்கம் பறிமுதல்

சென்னை,

சென்னை மீனம்பாக்கம் விமான நிலையத்துக்கு வெளிநாடுகளில் இருந்து வரும் விமானங்களில் பெரும் அளவில் தங்கம் கடத்தி வரப்படுவதாக விமான நிலைய சுங்க இலாகா முதன்மை கமிஷனர் மேத்யூ ஜோல்லிக்கு ரகசிய தகவல் கிடைத்தது. அவரது உத்தரவின்பேரில் சுங்க இலாகா அதிகாரிகள் விமான பயணிகளை தீவிரமாக கண்காணித்தனர்.

அப்போது இலங்கையில் இருந்து வந்த விமானத்தில் பயணம் செய்த பயணி ஒருவரை சந்தேகத்தின்பேரில் நிறுத்தி விசாரித்தனர். அதிகாரிகளிடம் அவர் முன்னுக்குபின் முரணாக பேசியதால் அவரது உடைமைகளை சோதனை செய்தனர்.

அப்போது அவரின் சூட்கேசில் தங்கத்தை கம்பிகளை மறைத்து வைத்து கடத்தி வந்ததை கண்டுபிடித்தனர்.அவரிடம் இருந்து ரூ.46 லட்சத்து 24 ஆயிரம் மதிப்புள்ள 1 கிலோ 038 கிராம் தங்கத்தை பறிமுதல் செய்தனர்.

இது தொடர்பாக பயணியை கைது செய்த சுங்க இலாகா அதிகாரிகள், மேலும் அவரிடம் விசாரணை நடத்தி வருகின்றனர்.