தனியார் நிறுவன ஊழியருக்கு 3 ஆண்டு சிறை

கோவை அருகே உள்ள பி.என்.புதூரை ேசர்ந்த ரேணி பிரியா என்பவருக்கும், அவருடைய கணவர் துரைராஜுக்கும் கருத்து வேறுபாடு ஏற்பட்டது. இதனால் அவர்கள் பிரிந்து வாழ்ந்தனர். இதை தொடர்ந்து தனியார் நிறுவன ஊழியரான துரைராஜ், ரேணி பிரியாவின் இ-மெயில் ஐ.டி.யை ஹேக் செய்து அதை பயன்படுத்த முடியாமல் தொந்தரவு செய்தார்.

இதுகுறித்த புகாரின்பேரில் கோவை மாநகர சைபர் கிரைம் போலீசார் வழக்குப்பதிவு செய்து துரைராஜை கைது செய்தனர்.

பின்னர் இதுதொடர்பான வழக்கு கோவை 4-வது மாஜிஸ்திரேட்டு கோர்ட்டில் நடந்து வந்தது. வழக்கு விசாரணை முடிந்ததை தொடர்ந்து தீர்ப்பு கூறப்பட்டது. அதன்படி குற்றம் சாட்டப்பட்ட துரைராஜிக்கு 3 ஆண்டு சிறை தண்டனையும், ரூ.5 ஆயிரம் அபராதமும் விதித்து மாஜிஸ்திரேட்டு சரவணபாபு தீர்ப்பு கூறினார்.