சுவாமிமலையில் சித்திரை பெருவிழா கொடியேற்றத்துடன் துவக்கம்

முருகனின் ஆறுபடை வீடுகளில் நான்காம் படைவீடான சுவாமிமலை சுவாமிநாதசுவாமி கோவில் திகழ்கிறது. தந்தையாகிய சிவபெருமானுக்கு ஓம் எனும் பிரணவமந்திரத்தை உபதேசம் செய்த தலமாகவும், நக்கீரரால் திருமுருகாற்றுப்படையிலும் அருணகிரிநாதரால் திருப்புகலிலும் பாடல் பெற்ற சிறப்பு வாய்ந்த தலமாகும்.

ஆண்டுதோறும் இக்கோவிலில் சித்திரை பெருவிழா நடைபெறுவது வழக்கம். அதுபோல் இந்த ஆண்டுக்கான சித்திரை திருவிழா இன்று காலை கொடியேற்றத்துடன் துவங்கியது. இதில் மகா துவாஜரோகனம் கொடியேற்றம் செய்து கொண்டு விநாயகர், ஸ்ரீ வள்ளி தேவசேனா சமேத ஸ்ரீ சுப்பிரமணிய சுவாமி ஸ்ரீ சண்டிகேஸ்வரர் உற்சவ மண்டபம் எழுந்தருளல் நிகழ்ச்சி நடைபெற்றது. 

தொடர்ந்து பத்து நாட்கள் நடைபெறும் இந்த திருவிழாவில் இரண்டாம் நாள் பல்லக்கில் சுவாமி திருவீதி உலா நடைபெறும். இதை தொடர்ந்து நாள்தோறும் இடும்பன் வாகனம், பூத வாகனம், ஆட்டுக்கடா வாகனம், தங்கமயில், வெள்ளி மயில், ஏனைய பரிவார வாகனத்தில் பஞ்சமூர்த்தி திருவிழா காட்சி நடைபெறும். தொடர்ந்து யானை வாகனம், காமதேனு வாகனம், வெண்ணைத்தாழி பல்லக்கு மற்றும் வெள்ளிகுதிரை வாகனத்திலும் சுவாமி வீதி உலா காட்சியும் நடைபெறுகிறது.

விழாவின் முக்கிய நிகழ்வாக வருகின்ற 18ஆம் தேதி 9ஆம் நாள் திருவிழா அன்று சித்திரை திருத்தேர் வடம் பிடித்தல் நிகழ்ச்சி நடைபெற உள்ளது. மறுநாள் மதியம் தீர்த்தவாரியும் இரவு அவரோகணம் திக்விதர்சனம் நிகழ்ச்சியின் நிறைவாக வருகின்ற 20ஆம் தேதி புதன்கிழமை சித்திரை திருவிழா முடிந்து சுவாமி யதாஸ்தானம் சேருதல் நிகழ்ச்சி வெகு விமரிசையாக நடைபெற உள்ளது. 

இந்த நிகழ்ச்சிக்கான அனைத்து ஏற்பாடுகளையும் திருக்கோயில் இணை ஆணையர் மாரிமுத்து ,உதவி ஆணையர் ஜீவானந்தம், மற்றும் திருக்கோயில் பணியாளர்கள் ,உபயதாரர்கள், சிறப்பாக செய்து வருகின்றனர்.