காரைக்கால் அரசு பள்ளி மாணவனுக்கு ஆசிரியர்கள் பாலியல் சீண்டல் போக்சோ சட்டத்தில் வழக்கு

காரைக்கால்

அரசு பள்ளி மாணவனுக்கு பாலியல் சீண்டல் கொடுத்த 2 ஆசிரியர்கள் மீது போக்சோ சட்டத்தில் வழக்குப்பதிவு செய்யப்பட்டுள்ளது.

காரைக்கால் பகுதியை சேர்ந்த 11 வயது சிறுவன் அரசு உயர்நிலைப்பள்ளியில் படித்து வருகிறான். சம்பவத்தன்று அவன் கழிப்பறைக்கு சென்றான். அப்போது பின்தொடர்ந்து சென்ற 2 ஆசிரியர்கள், மாணவனிடம் பாலியல் சீண்டலில் ஈடுபட்டதாக கூறப்படுகிறது.

இதை யாரிடமும் கூறினால் கொலை செய்து விடுவதாக மிரட்டியுள்ளனர். இதனால் பயந்து போன அந்த மாணவன் யாரிடமும் கூறாமல் இருந்துள்ளான்.

இந்தநிலையில் ஒரு கட்டத்தில் அந்த மாணவன், தனது பெற்றோரிடம் தெரிவித்தான். மேலும் ஆசிரியர்கள் பாலியல் சீண்டலில் ஈடுபட்டதாக அந்த மாணவன் பேசிய வீடியோ சமூக வலைத்தளத்தில் வைரலாக பரவியது.

அந்த வாக்குமூலத்தின் அடிப்படையில் காரைக்கால் நகர போலீசார் 2 ஆசிரியர்கள் மீது போக்சோ சட்டத்தின் கீழ் வழக்குப்பதிவு செய்து விசாரணை நடத்தி வருகின்றனர்.