திருடிய பசுமாடுகளை கொன்று யூ-டியூப்பில் சமையல் நிகழ்ச்சி: தந்தை-மகன் உள்பட 3 பேர் கைது

பெரும்பாவூர்,

கொல்லம் அருகே உள்ள கம்பம் கோடு பகுதியை சேர்ந்தவர் சஜி(வயது 48). இவர் பசுமாடுகள் வளர்த்து வருகிறார். இந்த நிலையில் சஜி தனக்கு சொந்தமான 4 மாத சினைமாட்டை அந்தப்பகுதியில் மேய்ச்சலுக்கு விட்டு இருந்தார்.

சிறிது நேரம் கழித்து சென்று பார்த்தபோது அந்த மாட்டை காணவில்லை. இதனால் அதிர்ச்சி அடைந்த சஜி, ஏரூர் போலீஸ் நிலையத்தில் புகார் அளித்தார். அதன்பேரில் போலீசார் வழக்குப்பதிவு செய்தனர். மேலும் அதே போலீஸ் நிலையத்தில் 5-க்கும் மேற்பட்ட பசுமாடுகள் திருட்டு புகார் வந்து இருந்தன. இதனால் போலீசார் விசாரணையை முடுக்கி விட்டனர்.

அதில், காணாமல் போன பசுமாடுகளை கொல்லம் மாவட்டம் விதுரா பகுதியை சேர்ந்த நஜீப்(36) என்ற நபர் திருடி சென்றது தெரியவந்தது. இதையடுத்து நஜீப்பை பிடித்து போலீசார் விசாரித்தனர்.

அப்போது நஜீப் மற்றும் அவரது தந்தை கமருதீன்(56), கொச்சாலம் மூடு பகுதியை சேர்ந்த உறவினர் ஹிலாரி(48) ஆகியோர் பசுமாடுகளை திருடி சென்று, அவற்றை கொன்று இறைச்சியை கொண்டு ‘ஹங்கிரி கேப்டன்’ என்ற யூ-டியூப் சேனலில் மாட்டு இறைச்சி சமையல் செய்வது குறித்த வீடியோக்களை பதிவேற்றம் செய்தது கண்டுபிடிக்கப்பட்டது.

இதையடுத்து அவர்கள் 3 பேரையும் போலீசார் கைது செய்தனர். மேலும் அவர்களிடம் இருந்து பசுமாடுகளை கடத்தி சென்று கொல்ல பயன்படுத்திய துப்பாக்கி, வெடி மருந்துகள், ஈயம், பேட்டரி ஆகியவைகளை போலீசார் பறிமுதல் செய்தனர். இதையடுத்து கைது செய்யப்பட்ட 3 பேரும் கொல்லம் முதல் வகுப்பு நீதிமன்றத்தில் ஆஜர்படுத்தி சிறையில் அடைக்கப்பட்டனர்.

யூ-டியூப் சேனல் நடத்துவதற்காக பசுமாடுகளை திருடி கொன்று சமையல் நிகழ்ச்சி நடத்திய சம்பவம், அந்த பகுதியில் பெரும் பரபரப்பை ஏற்படுத்தியது.