“போராடி பெற்ற சமூகநீதியை யாருக்காகவும், எதற்காகவும் விட்டுத்தர மாட்டோம்” - மு.க.ஸ்டாலின் பேச்சு

அப்போது அவர் பேசியதாவது:-

கடலூர் மாவட்டத்துக்கு திமுக ஆட்சியில் ஏராளமான திட்டங்கள் செயல்படுத்தப்பட்டுள்ளன. மாவட்டத்திற்கு மேலும் பல திட்டங்கள் செயல்படுத்தப்படும்.

ஏழை மாணவர்களின் மருத்துவ கனவை சிதைக்கும் தேர்வாக நீட் உள்ளது. நீட் தேர்வை ஏற்றால், பொறியியல், கலை கல்லூரி மாணவர்களுக்கும் இது போன்று தேர்வு வரும். புதிய கல்விக்கொள்கை என்பதே மாணவர்களை வடிகட்டத்தான். கல்வி உரிமையை பறிக்கவே புதிய கல்விக்கொள்கையை அமல்படுத்த துடிக்கிறார்கள்.

மாநில அரசு சட்டம் நிறைவேற்றினால் கவர்னர் அமைச்சரவை முடிவிற்கு கட்டுப்பட்டே நடக்க வேண்டும். பொதுப்பட்டியலில் உள்ள பொருள் குறித்து மாநில அரசின் மசோதாக்களை கண்டிப்பாக கவர்னர் ஜனாதிபதிக்கு அனுப்ப வேண்டும். நாடாளுமன்றத்துடன் முரண்படும் சட்டத்தை நிறைவேற்றினால் ஜனாதிபதிக்கு அனுப்ப வேண்டியது கவர்னரின் கடமை. ஆனால் கவரனர் அந்த கடமையை தவறிவிட்டார். இனியாவது கவர்னர் செய்வார் என்று எதிர்பார்க்கிறேன்.

போராடி பெற்ற சமூகநீதியை யாருக்காகவும், எதற்காகவும் விட்டுத்தர மாட்டோம். சமூகநீதி மட்டுமல்ல, மாநில சுயாட்சியும் திராவிட ஆட்சியின் கொடை தான். வேற்றுமையில் ஒற்றுமை என்ற இந்திய பண்பாட்டை சிதைக்கலாமா?  மாநில சுயாட்சியை நிலைநாட்ட அண்ணா, கலைஞர் மேற்கொண்ட நடவடிக்கைகளை சுட்டிக்காட்டி முதல்-அமைச்சர் மு.க.ஸ்டாலின் பேசினார்.