வருகிற 12-ந்தேதி முதல் சென்னை-டெல்லி, திருச்சி-ஹவுரா இடையே சிறப்பு ரெயில்கள் இயக்கம் - தெற்கு ரெயில்வே அறிவிப்பு

சென்னை,

தெற்கு ரெயில்வே வெளியிட்டுள்ள செய்திக்குறிப்பில் கூறப்பட்டிருப்பதாவது:-

ரெயில்வே வாரியம் அனுமதி அளித்ததையடுத்து கீழ்க்கண்ட சிறப்பு ரெயில்கள் 12-ந்தேதி முதல் இயக்கப்படுகிறது.

* சென்னை எம்.ஜி.ஆர். சென்டிரல்- டெல்லி (வண்டி எண்: 02615) இடையே தினசரி இயக்கப்படும் அதிவிரைவு சிறப்பு ரெயில் சென்டிரல் ரெயில் நிலையத்தில் இருந்து இரவு 7.15 மணிக்கு புறப்பட்டு 3-வது நாள் காலை 6.30 மணிக்கு டெல்லி சென்றடையும். மறுமார்க்கமாக டெல்லி- எம்.ஜி.ஆர். சென்டிரல் (02616) இடையே இயக்கப்படும் அதிவிரைவு சிறப்பு ரெயில் டெல்லியில் இருந்து மாலை 6.40 மணிக்கு புறப்பட்டு 3-வது நாள் காலை 6.20 மணிக்கு சென்னை சென்டிரல் வந்தடையும்.

* சென்னை எம்.ஜி.ஆர். சென்டிரல்- ஷாப்ரா (02669) இடையே திங்கள் மற்றும் சனிக்கிழமைகளில் இயக்கப்படும் வாராந்திர சிறப்பு ரெயில் சென்டிரல் ரெயில் நிலையத்தில் இருந்து மாலை 5.40 மணிக்கு புறப்படும். மறுமார்க்கமாக ஷாப்ரா- எம்.ஜி.ஆர். சென்டிரல் (02670) இடையே திங்கள் மற்றும் புதன்கிழமைகளில் இயக்கப்படும் வாராந்திர சிறப்பு ரெயில் ஷாப்ரா ரெயில் நிலையத்தில் இருந்து இரவு 9 மணிக்கு புறப்படும்.

* திருச்சி- ஹவுரா (02664) இடையே செவ்வாய் மற்றும் வெள்ளிக்கிழமைகளில் இயக்கப்படும் வாராந்திர சிறப்பு ரெயில் திருச்சி ரெயில் நிலையத்தில் இருந்து மாலை 4.20 மணிக்கு புறப்படும். மறுமார்க்கமாக ஹவுரா- திருச்சி (02663) இடையே வியாழன், ஞாயிற்றுக் கிழமைகளில் இயக்கப்படும் வாராந்திர சிறப்பு ரெயில் ஹவுராவில் இருந்து மாலை 4.10 மணிக்கு புறப்படும்.

இவ்வாறு அதில் கூறப்பட்டு உள்ளது.