விபத்துகளில் பெண் உள்பட 2 பேர் சாவு

கொட்டாம்பட்டி,

கொட்டாம்பட்டி அருகே உள்ள குமுட்ராம்பட்டியை சேர்ந்தவர் செல்லையா. இவருடைய மனைவி சின்னம்மாள் (வயது 50). இவர் நேற்று முன்தினம் மாலையில் தண்ணீர் பிடித்துக்கொண்டு மதுரை-திருச்சி நான்கு வழி சாலையில் குமுட்ராம்பட்டி விலக்கு அருகே நின்று கொண்டிருந்தார்.அப்போது மதுரையில் இருந்து திருச்சி நோக்கி சென்ற அடையாளம் தெரியாத வாகனம் சின்னம்மாள் மீது மோதிவிட்டு நிற்காமல் சென்றுவிட்டது, விபத்தில் படுகாயமடைந்த சின்னம்மாளை மீட்டு 108 ஆம்புலன்ஸ் மூலம் மேலூர் அரசு மருத்துவமனையில் சேர்த்தனர். பின்னர் மேல் சிகிச்சைக்காக மதுரை அரசு மருத்துவமனையில் அனுமதிக்கப்பட்டார். அங்கு சிகிச்சை பலனின்றி அவர் பரிதாபமாக உயிரிழந்தார். கொட்டாம்பட்டி அருகே உள்ள கச்சிராயன்பட்டியை சேர்ந்த காந்தி (60). இவருடைய மனைவி வசந்தா மற்றும் மகன் ஜெயபாண்டி. இவர்கள் 3 பேரும் கடந்த 29-ந்தேதி இரவு கச்சிராயன்பட்டி விலக்கு அருகே நான்கு வழி சாலை ஓரத்தில் நடந்து சென்றனர். அப்போது மோட்டார் சைக்கிளில் வந்த கச்சிராயன்பட்டியை சேர்ந்த போத்திராஜா, காந்தி மீது மோதினார். இதில் காயம் அடைந்த அவர் 108 ஆம்புலன்ஸ் மூலம் மேலூர் அரசு மருத்துவமனையில் சேர்த்தனர். பின்னர் மேல் சிகிச்சைக்காக மதுரை அரசு மருத்துவமனையில் அனுமதிக்கப்பட்டார். அங்கு அவர் சிகிச்சை பலனின்றி உயிரிழந்தார். இந்த விபத்து குறித்து கொட்டாம்பட்டி போலீசார் வழக்கு பதிவு செய்து விசாரணை நடத்தி வருகின்றனர்.