குமரியில் 15 லட்சத்து 46 ஆயிரத்து 581 வாக்காளர்கள்

நாகர்கோவில்:

குமரி மாவட்டத்தில் இறுதி வாக்காளர் பட்டியல் வெளியிடப்பட்டதில் மொத்தம் 15 லட்சத்து 46 ஆயிரத்து 581 வாக்காளர்கள் உள்ளனர். அதில் ஆண்களை விட பெண்கள் அதிகம் இடம் பெற்றுள்ளனர்.

இறுதி வாக்காளர் பட்டியல்

தமிழகம் முழுவதும் நேற்று இறுதி வாக்காளர் பட்டியல் வெளியிடப்பட்டன. அதன்படி நாகர்கோவில் கலெக்டர் அலுவலகத்தில் வைத்து மாவட்ட கலெக்டர் அரவிந்த், அரசியல் கட்சியினர் முன்னிலையில் இறுதி வாக்காளர் பட்டியலை வெளியிட்டார். இதில் தி.மு.க. சார்பில் மாநகர செயலாளர் ஆனந்த், அ.தி.மு.க. சார்பில் ஜெயகோபால், காங்கிரஸ் கட்சி சார்பில் மாவட்ட தலைவர் நவீன் குமார், பா.ஜனதா கட்சி சார்பில் ஜெகநாதன், தே.மு.தி.க சார்பில் செல்வக்குமார் உள்பட அரசியல் கட்சியினர் கலந்து கொண்டனர். இதைத்தொடர்ந்து கலெக்டர் அரவிந்த் நிருபர்களுக்கு பேட்டி அளித்தார்.

அப்போது அவர் கூறியதாவது:-

குமரி மாவட்டத்தில் கடந்த நவம்பர் மாதம் 9-ந் தேதியன்று வரைவு வாக்காளர் பட்டியல் வெளியிடப்பட்டது. அப்போது 6 சட்டமன்ற தொகுதிகளிலும் 15 லட்சத்து 50 ஆயிரத்து 776 வாக்காளர்கள் இருந்தனர். இதைத் தொடர்ந்து வாக்காளர் பட்டியலில் பெயர் சேர்த்தல் மற்றும் நீக்குதல் தொடர்பான சிறப்பு முகாம் நடந்தது.

பெண் வாக்காளர்கள் அதிகம்

இதைத் தொடர்ந்து இன்று (அதாவது நேற்று) இறுதி வாக்காளர் பட்டியல் வெளியிடப்பட்டுள்ளது. அதன் அடிப்படையில் கன்னியாகுமரி மாவட்டத்தில் உள்ள 6 சட்டமன்ற தொகுதிகளிலும் 7 லட்சத்து 71 ஆயிரத்து 824 ஆண் வாக்காளர்கள், 7 லட்சத்து 74 ஆயிரத்து 615 பெண் வாக்காளர்கள் மற்றும 142 இதர வாக்காளர்கள் என மொத்தம் 15 லட்சத்து 46 ஆயிரத்து 581 வாக்காளர்கள் உள்ளனர். ஆண்களை காட்டிலும் பெண் வாக்காளர்கள் அதிகம் உள்ளனர்.

கன்னியாகுமரி சட்டமன்ற தொகுதியில் அதிகபட்சமாக 2 லட்சத்து 91 ஆயிரத்து 671 வாக்காளர்கள் உள்ளனர். இங்கு ஆண் வாக்காளர்கள் 1 லட்சத்து 44 ஆயிரத்து 389 பேரும், பெண் வாக்காளர்கள் 1 லட்சத்து 47 ஆயிரத்து 215 பேரும், இதர வாக்காளர்கள் 67 பேரும் இடம் பெற்றுள்ளனர். குறைந்தபட்சமாக பத்மநாபபுரம் தொகுதியில் 2 லட்சத்து 38 ஆயிரத்து 5 வாக்காளர்கள் உள்ளனர். இங்கு ஆண் வாக்காளர்கள் 1 லட்சத்து 19 ஆயிரத்து 766 பேரும், பெண் வாக்காளர்கள் 1 லட்சத்து 18 ஆயிரத்து 214 பெண் வாக்காளர்களும், இதர வாக்காளர்கள் 25 பேரும் உள்ளனர்.

தொகுதி வாரியாக...

நாகர்கோவில் சட்டமன்ற தொகுதியில் 1 லட்சத்து 28 ஆயிரத்து 890 ஆண் வாக்காளர்களும், 1 லட்சத்து 32 ஆயிரத்து 540 பெண் வாக்காளர்களும், 13 இதர வாக்காளர்களும் என மொத்தம் 2 லட்சத்து 61 ஆயிரத்து 443 பேர் உள்ளனர். குளச்சல் சட்டமன்ற தொகுதியில் 1 லட்சத்து 33 ஆயிரத்து 728 ஆண் வாக்காளர்கள், 1 லட்சத்து 30 ஆயிரத்து 179 பெண் வாக்காளர்கள் மற்றும் 14 இதர வாக்காளர்கள் என மொத்தம் 2 லட்சத்து 63 ஆயிரத்து 921 பேர் உள்ளனர்.

விளவங்கோடு சட்டமன்ற தொகுதியில் 1 லட்சத்து 20 ஆயிரத்து 697 ஆண் வாக்காளர்கள், 1 லட்சத்து 24 ஆயிரத்து 994 பெண் வாக்காளர்கள் மற்றும் 3 இதர வாக்காளர்கள் என மொத்தம் 2 லட்சத்து 45 ஆயிரத்து 694 பேர் உள்ளனர். கிள்ளியூர் சட்டமன்ற தொகுதியில் 1 லட்சத்து 24 ஆயிரத்து 354 ஆண் வாக்காளர்கள், 1 லட்சத்து 21 ஆயிரத்து 473 பெண் வாக்காளர்கள் மற்றும் 20 இதர வாக்காளர்கள் என மொத்தம் 2 லட்சத்து 45 ஆயிரத்து 847 பேர் உள்ளனர்.

இவ்வாறு அவர் கூறினார்.

நிகழ்ச்சியில் மாவட்ட வருவாய் அதிகாரி சிவப்பிரியா, நாகர்கோவில் கோட்டாட்சியர் சேதுராமலிங்கம், தேர்தல் தாசில்தார் சுசீலா மற்றும் பலர் கலந்து கொண்டனர்.