சரக்கு ரெயிலில் 1,250 டன் அரிசி அனுப்பி வைப்பு

திருவாரூர் மாவட்டத்தில் நேரடி நெல் கொள்முதல் நிலையம் மூலம் விவசாயிகளிடம் இருந்து நெல் கொள்முதல் செய்யப்பட்டது. இந்த நெல் மாவட்டத்தில் உள்ள அரசு அங்கீகரிக்கப்பட்ட அரவை மில்லுக்கு அனுப்பி அரிசியாக தயாரானது. இந்த அரிசி பொதுவினியோக திட்டத்தின் மூலம் பொதுமக்களுக்கு வழங்குவதற்காக பல்வேறு மாவட்டங்களுக்கு சரக்கு ரெயில் மூலம் அனுப்பி வைக்கப்பட்டு வருகிறது. அதன்படி நேற்று திருவாரூர் மற்றும் அதனை சுற்றியுள்ள பகுதிகளில் இருந்து அரிசி மூட்டைகள் லாரிகள் மூலம் திருவாரூர் ரெயில் நிலையம் கொண்டு வரப்பட்டது. அங்கிருந்து சரக்கு ரெயில் மூலம் 21 பெட்டிகளில் ஏற்றப்பட்டு 1,250 டன் அரிசி பொது வினியோக திட்டத்திற்காக வேலூருக்கு அனுப்பி வைக்கப்பட்டன.