அமெரிக்க டாலருக்கு நிகரான இந்திய ரூபாயின் மதிப்பு வரலாறு காணாத வீழ்ச்சி

புதுடெல்லி,

கொரோனாவால் வீழ்ந்த பொருளாதாரத்தை மீட்டெடுக்க பல நாடுகள் முயற்சித்து வரும் நிலையில் உக்ரைன் - ரஷியா இடையேயான போர் உலக பொருளாதாரத்தை மேலும் பின்னோக்கி தள்ளுகிறது.

மேலும், போரால் கச்சா எண்ணெய், உணவு தானியங்களில் விலை அதிகரிக்கத்தொடங்கியுள்ளது. இதன் காரணமாக அமெரிக்கா உள்பட பல நாடுகளில் பொருட்களின் விலை ஏற்றமடைந்து பணவீக்கம் அதிகரித்துள்ளது.

பண வீக்கத்தை கட்டுப்படுத்த அமெரிக்க மத்திய வங்கி உள்பட பல நாடுகளின் வங்கிகள் வட்டி விகிதத்தை அதிகரித்துள்ளன. வட்டி விகித அதிகரிப்பு அன்னிய செலவாணி சந்தையில் அமெரிக்க டாலரின் தேவையை அதிகரித்து அதன் மதிப்பை உயர்த்தியுள்ளது.

அதேவேளை, முதலீடுகளை பல நாடுகளும் டாலருக்கு மாற்றி வருவதால் டாலரின் மதிப்பு உயர்ந்து வருகிறது. மேலும், இந்திய பங்குச்சந்தையில் இருந்து அன்னிய முதலீடுகளை டாலராக மாற்றுதல், சந்தையில் இருந்து வெளியேற்றல் போன்ற காரணங்களால் அமெரிக்க டாலருக்கு நிகரான இந்திய ரூபாயின் மதிப்பு தொடர்ந்து சரிந்து வருகிறது.

இந்நிலையில், அமெரிக்க டாலருக்கு எதிரான இந்திய ரூபாயின் மதிப்பு வரலாற்றில் இதுவரை இல்லாத வகையில் சரிவைக் கண்டது.

இந்திய பங்குச்சந்தை இன்று வர்த்தகத்தை தொடங்கியது முதல் டாலருக்கு நிகரான இந்திய ரூபாயின் மதிப்பு வீழ்ச்சியடைந்து வருகிறது.

பங்குச்சந்தையில் நேற்று வர்த்தக இறுதியில் டாலருக்கு நிகரான இந்திய ரூபாயின் மதிப்பு 82.78 ரூபாயாக நிறைவைந்தது. இன்று காலை வர்த்தகம் தொடங்கியதுமே டாலருக்கு நிகரான ரூபாயின் மதிப்பு சற்று உயர்ந்து ரூ. 82.69 ஆக இருந்தது.

ஆனால், இன்றைய நாளில் வர்த்தகத்தின் இறுதியில் டாலருக்கு நிகரான ரூபாயின் மதிப்பு வரலாறு காணத அளவிற்கு 83 ரூபாயாக வீழ்ச்சியடைந்தது. இதனால், முதலீட்டாளர்கள் அதிர்ச்சியடைந்துள்ளனர்.

இதற்உ முன் கடந்த ஆண்டு அக்டோபர் மாதம் 19-ம் தேதியும் டாலருக்கு நிகரான இந்திய ரூபாயின் மதிப்பு 83 ரூபாயாக இருந்தது என்பது குறிப்பிடத்தக்கது.