புதுச்சேரியில் பிளஸ்-2 பொதுத்தேர்வு முடிவு வெளியானது: 92.41 சதவீதம் பேர் தேர்ச்சி

புதுச்சேரி,

புதுச்சேரியில் கடந்த மார்ச் 1-ந் தேதி முதல் மார்ச் 22-ந் தேதி வரை பிளஸ்-2 பொதுத்தேர்வு நடந்தது. புதுச்சேரியில் 11 ஆயிரத்து 856 பேரும், காரைக்காலில் 2 ஆயிரத்து 152 பேரும் என மொத்தம் 14 ஆயிரத்து 8 மாணவ, மாணவிகள் இந்த தேர்வை எழுதினர். இதையடுத்து விடைத்தாள் திருத்தும் பணி கடந்த மாதம் 2-ந் தேதி தொடங்கி 13-ந் தேதி வரை நடந்தது.

இந்த நிலையில், பிளஸ்-2 தேர்வு முடிவுகள் இன்று வெளியிடப்பட்டு உள்ளது. தேர்வு முடிவுகளை www.tnresults.nic.in., www.dge.tn.gov.in. என்ற இணையதளத்தில் பார்த்து தெரிந்து கொள்ளலாம் என்றும் அறிவிக்கப்பட்டுள்ளது. மாணவர்களுக்கு தேர்வு முடிவுகள் குறுஞ்செய்தி மூலம் அனுப்பப்பட்டுள்ளது.

தேர்வு முடிவுகள் குறித்து புதுச்சேரி பள்ளிக்கல்வித்துறை வெளியிட்டுள்ள செய்திக்குறிப்பில் கூறியிருப்பதாவது:-

கடந்த மார்ச் மாதம் நடைபெற்ற பிளஸ்-2 பொதுத்தேர்வில் புதுச்சேரி மற்றும் காரைக்கால் பகுதியைச் சார்ந்த 6,566 மாணவர்களும் 7,446 மாணவிகளும் ஆக மொத்தம் 14,012 மாணவர்கள் தேர்வு எழுதினர்.

இன்று வெளியான தேர்வு முடிவுகளின் படி அரசு மற்றும் தனியார் பள்ளிகளில் பயின்ற 12,948 மாணவ-மாணவிகள் தேர்ச்சி பெற்றுள்ளனர். இதில் 5,867 மாணவர்களும் 7,081 மாணவிகளும் தேர்ச்சி பெற்றுள்ளனர். மொத்தம் 92.41 சதவீதம் பேர் பொதுத்தேர்வில் தேர்ச்சி பெற்றுள்ளனர்.

* புதுச்சேரி மற்றும் காரைக்காலில் உள்ள அனைத்து பள்ளிகளின் தேர்ச்சி விழுக்காடு 92.41 சதவீதம்.

* புதுச்சேரி மற்றும் காரைக்காலில் உள்ள அனைத்து அரசு பள்ளிகளின் தேர்ச்சி விழுக்காடு 85.35 சதவீதம். புதுச்சேரி பகுதியில் உள்ள அரசு பள்ளிகளின் மொத்த தேர்ச்சி விழுக்காடு கடந்த ஆண்டை விட உயர்ந்துள்ளது. இவ்வாறு அதில் தெரிவிக்கப்பட்டுள்ளது.