குறைகிறது இந்துக்கள் மக்கள் தொகை: இஸ்லாமியர்கள் எண்ணிக்கை உயர்வு ; ஆய்வறிக்கையில் தகவல்

புதுடெல்லி,

இந்தியாவில் 1950-ம் ஆண்டு முதல் 2015-ம் ஆண்டு வரையிலான காலகட்டத்தில் இந்துக்களின் மக்கள் தொகை 7.82% குறைந்துள்ளதாகவும், அதே சமயம் இஸ்லாமியர்களின் மக்கள் தொகை 43.15% அதிகரித்துள்ளதாகவும் பிரதமருக்கான பொருளாதார ஆலோசனைக் குழுவின் ஆய்வறிக்கையில் தெரிவிக்கப்பட்டுள்ளது. இது நாட்டில் பன்முகத்தன்மையை வளர்ப்பதற்கு உகந்த சூழல் இருப்பதை காட்டுவதாக அதில் கூறப்பட்டுள்ளது.

'மத சிறுபான்மையினரின் பங்கு: ஒரு பகுப்பாய்வு(1950-2015)' என்ற தலைப்பில் வெளியாகியுள்ள அந்த ஆய்வறிக்கையில், இந்தியாவில் ஜெயின் மக்கள் தொகை கடந்த 1950-ம் ஆண்டு 0.45% ஆக இருந்த நிலையில், 2015-ல் 0.36% ஆக குறைந்துள்ளதாக தெரிவிக்கப்பட்டுள்ளது.

அதே சமயம் கிறிஸ்தவர்கள் மக்கள் தொகை 1950-ல் 2.2% ஆக இருந்த நிலையில், அவர்களின் பங்கு 5.38% அதிகரித்து 2015-ல் 2.36% ஆக உள்ளதாக குறிப்பிடப்பட்டுள்ளது. அதே போல் சீக்கியர்கள் மக்கள் தொகை 1950-ல் 1.24% ஆக இருந்த நிலையில், அவர்களின் பங்கு 6.58% அதிகரித்து 2015-ல் 1.85% ஆக உள்ளது.

இந்தியாவில் பெரும்பான்மையாக உள்ள இந்துக்களின் மக்கள் தொகை 1950-ல் 84.68% ஆக இருந்ததாகவும், அதுவே 7.82% குறைந்து 2015-ம் ஆண்டில் 78.06% ஆக உள்ளது என்றும் அந்த அறிக்கையில் கூறப்பட்டுள்ளது. இதே காலகட்டத்தில் இஸ்லாமியர்களின் மக்கள் தொகை 9.84%-ல் இருந்து 14.09% ஆக அதிகரித்துள்ளது. இதன் மூலம் இஸ்லாமியர்களின் மக்கள் தொகை 43.15% உயர்ந்துள்ளதாக தெரிவிக்கப்பட்டுள்ளது.

இந்தியாவில் மேற்கொள்ளப்பட்ட கொள்கை நடவடிக்கைகள், அரசியல் முடிவுகள், சமூக நடைமுறைகளின் தாக்கம் ஆகியவற்றால் நாட்டில் பன்முகத்தன்மையை வளர்ப்பதற்கு உகந்த சூழல் நிலவுவதாகவும், இதுவே பெரும்பான்மை மக்கள் தொகை பங்கு சரிவதற்கும, சிறுபான்மையினரின் பங்கு அதிகரிப்பதற்கும் காரணம் என்றும் அந்த அறிக்கையில் கூறப்பட்டுள்ளது.

சர்வதேச அளவில் பெரும்பான்மை மக்களின் விகிதம் குறைந்து வரும் போக்கு நிலவுவதாகவும், அதையொட்டி இந்தியாவிலும் பெரும்பான்மை மக்களின் விகிதம் 7.82% குறைந்துள்ளதாகவும் அந்த அறிக்கையில் சுட்டிக்காட்டப்பட்டுள்ளது. அண்டை நாடுகளில் நிலவும் நெருக்கடியான சூழலுக்கு மத்தியில் இந்தியாவில் சிறுபான்மையினரின் பங்கு அதிகரித்திருப்பதில் ஆச்சரியமில்லை எனவும் அதில் குறிப்பிடப்பட்டுள்ளது.