மதுரவாயல்-ஸ்ரீபெரும்புதூர் சாலையை 6 வழிச்சாலையாக தரம் உயர்த்த கோரிக்கை - அமைச்சர் எ.வ.வேலு பேட்டி

புதுடெல்லி,

தமிழக பொதுப்பணித் துறை அமைச்சர் எ.வ.வேலு மத்திய மந்திரி நிதின் கட்கரியை டெல்லியில் நேற்று இரவு சந்தித்து பேசினார்.

இந்த சந்திப்பிற்கு பிறகு அமைச்சர் எ.வ.வேலு செய்தியாளர்களுக்கு இன்று பேட்டி அளித்தார்.

அப்போது அவர் கூறியதாவது:-

மத்திய மந்திரி நிதின் கட்கரியை சந்தித்து 10 திட்டங்கள் குறித்து வலியுறுத்தியுள்ளோம். தமிழக திட்டங்களுக்கு மத்திய அரசு முழுமையாக ஒத்துழைப்பு வழங்கும் என நிதின் கட்கரி தெரிவித்துள்ளார்.

பரனூர், சென்ன சமுத்திரம், வானகரம், சூரப்பட்டு, நெமிலி ஆகிய 5 சுங்கச்சாவடிகளை அகற்ற வேண்டும் என கோரிக்கை வைக்கப்பட்டுள்ளது. மதுரவாயல்-ஸ்ரீபெரும்புதூர் சாலையை 6 வழிச்சாலையாக தரம் உயர்த்த வேண்டும் என கோரிக்கை வைத்துள்ளோம். தமிழ்நாட்டில் 8 சாலைகளை தேசிய நெடுஞ்சாலையாக மாற்ற வேண்டும்.

திருச்சியில் இருந்து துவாக்குடி இடையே உயர்மட்ட சாலை அமைக்க மத்திய அரசிடம் கோரிக்கை வைத்துள்ளோம். தமிழ்நாட்டில் நிலுவையில் உள்ள பல நெடுஞ்சாலை திட்டங்களை விரைவுபடுத்த வேண்டும் என கோரிக்கை வைத்துள்ளோம்.

இவ்வாறு அவர் கூறினார்.