தொழில்களை ஊக்குவித்து சிறந்து விளங்கும் மாநிலங்களின் தரவரிசை பட்டியலில் இடம் பெற்ற மாநிலங்கள்

புதுடெல்லி

ஸ்டார்ட்-அப் ஈகோ சிஸ்டம் எனப்படும் புது நிறுவனங்களை தொடங்குவதற்கான சூழலுக்கு ஆதரவளிக்கும் பல்வேறு காரணிகளை அடிப்படையாக கொண்டு, மாநிலங்களின்  தரவரிசைப் பட்டியலை மத்திய அரசு ஆண்டுதோறும் வெளியிட்டு வருகிறது. 2019 ஆம் ஆண்டுக்கான பட்டியலை மத்திய வர்த்தகம், தொழில்கள் மற்றும் ரெயில்வே துறை அமைச்சர் பியூஷ் கோயல் நேற்று வெளியிட்டார்.

இதில், கர்நாடகா, கேரளா ஆகிய மாநிலங்கள் முதலிடத்தை பிடித்துள்ளது. குஜராத் மாநிலம் இரண்டாவது இடத்தை தக்கவைத்துள்ளது. புதிய தொழில் தொடங்குவதற்கான சிறந்த தலைமைகளை கொண்ட மாநிலங்களின் பட்டியலில் மராட்டியம், பீகார், ஒடிசா, ராஜஸ்தான் ஆகிய மாநிலங்கள் இடம்பெற்றுள்ளன.

தொடக்க கண்டுபிடிப்பாளர்களுக்கு வசதிகளை வழங்குவதில் கர்நாடகா மற்றும் கேரள மாநிலங்கள் முக்கிய பங்கு வகிக்கின்றன. புதிய வகை திட்டங்களுக்கு பொருத்தமான தொழில்நுட்ப ஆதரவு மற்றும் புதுமையின் சவால்களுக்கு விரைவான தீர்வுகள் போன்ற காரணிகள் இதில் அடங்கும்.

ஸ்டார்ட் - அப் ஈகோ சிஸ்டத்தில் வளர்ந்துவரும் மாநிலங்களின் பட்டியலில் தான் தமிழகம் இடம்பெற்றுள்ளது. ஆந்திர பிரதேசம், அசாம், சத்தீஸ்கார், டெல்லி, உத்தரப் பிரதேசம், மத்திய பிரதேசம், இமாசலப் பிரதேசம் ஆகிய மாநிலங்களும் இந்தப் பட்டியலில் இடம்பெற்றுள்ளன.

கடந்த ஆண்டு புதிய தொழில் தொடங்குவதற்கான தரவரிசையில், வளர்ந்து வரும் தொழில்முனைவோருக்கான தொடக்க சுற்றுச்சூழல் அமைப்பை உருவாக்குவதற்கான சிறந்த மாநிலமாக குஜராத் இடம் பெற்றது, அதன்பின்னர் கர்நாடகா, கேரளா, ஒடிசா மற்றும் ராஜஸ்தான் ஆகியவை சிறந்த மாநிலமாக கருதப்பட்டன.