தேர்தலில் போட்டியும் கிடையாது, பிரசாரமும் கிடையாது -சல்மான்கான் விளக்கம்

2019 நாடாளுமன்றத் தேர்தலில் மத்திய பிரதேசத்தில் பா.ஜனதா கோட்டையான இந்தூரில் பிரசாரம் செய்ய சல்மான்கானுக்கு காங்கிரஸ் அழைப்பு விடுத்துள்ளது. மத்திய பிரதேச மாநிலம் இந்தூர் பாராளுமன்றத் தொகுதியில் மக்களவை சபாநாயகர் சுமித்ரா மகாஜன் 1989-ம் ஆண்டிலிருந்து வெற்றிப்பெற்று வருகிறார். அவரை தொகுதி மக்கள் தங்களுடைய சகோதரி என்றே அழைக்கிறார்கள். இந்தூர் சல்மான்கானின் சொந்த ஊராகும். எனவே அவரை பிரசாரத்திற்கு இழுக்க காங்கிரஸ் முயற்சி செய்தது.

இதற்கிடையே பிரதமர் மோடி இளைஞர்கள் வாக்களிப்பதை ஊக்குவிக்குமாறு சல்மான்கானை கேட்டுக்கொண்டார். இதற்கு பதில் அளித்த சல்மான்கான், “நாம் ஜனநாயக நாட்டில் உள்ளோம், வாக்களிப்பது ஒவ்வொரு இந்தியரின் உரிமையாகும். வாக்களிக்க தகுதிப்பெற்ற இந்தியர்கள் தங்களுடைய வாக்கை பதிவு செய்ய வேண்டும், அரசை நிர்ணயம் செய்வதில் கலந்துக்கொள்ளுங்கள் என வலியுறுத்துகிறேன்,” என குறிப்பிட்டார். இது பா.ஜனதாவிற்காக சல்மான்கான் பிரசாரம் செய்ய உள்ளார் என்ற புரளிக்கு வழிவகை செய்தது.

இந்நிலையில் இதற்கு மறுப்பு தெரிவிக்கும் வகையில், “தேர்தல்களில் போட்டியிடவில்லை, எந்த கட்சிக்கும் பிரசாரம் செய்யப்போவதும் கிடையாது,” என சல்மான்கான் கூறியுள்ளார்.