நடிகை சோனம் கபூர் வீட்டில் ரூ. 2.40 கோடி பணம், நகை கொள்ளையடித்த நர்சு...!

புதுடெல்லி,

இந்தி திரையுலகில் பிரபல நடிகை சோனம் கபூர்.  பிரபல நடிகர் அனில் கபூரின் மகளான சோனம் கபூரின் கணவர் ஆனந்த் அகுஜா.  திருமணம் முடிந்தபின், இருவரும் டெல்லியில் வசித்து வருகின்றனர். 

இதற்கிடையில், கடந்த பிப்ரவரி 11-ந்தேதி சோனம் கபூரின் வீட்டில் நகை மற்றும் பணம் கொள்ளை போயுள்ளது.  சம்பவம் நடந்து 2 வாரங்களுக்கு பின்னர் கடந்த பிப்ரவரி 23ந்தேதி சோனம் கபூரின் மேலாளர் போலீசில் புகார் அளித்துள்ளார்.

இதனை தொடர்ந்து, வழக்குப்பதிவு செய்த போலீசார் சோனம் கபூரின் வீட்டில் வேலை செய்து வரும் 20-க்கும் மேற்பட்ட பணியாளர்களிடம் கொள்ளை குறித்து விசாரணை நடத்தினர்.

இந்நிலையில், போலீசார் நடத்திய விசாரணையில் சோனம் கபூரின் வீட்டில் நர்சாக பணிபுரியும் அபர்னா ருது வில்சன் ( வயது 31) என்ற பெண் இந்த கொள்ளையில் ஈடுபட்டது தெரியவந்துள்ளது. 

சோனம் கபூரின் மாமியாரின் உடல்நிலையை கவனிப்பதற்காக நர்சஸ் அபர்னா பணியமர்த்தப்பட்டுள்ளார். அவர், சோனம் கபூரின் வீட்டில் யாரும் இல்லாத நேரத்தில் வீட்டில் இருந்த 2.40 கோடி ரூபாய் மதிப்புள்ள பணம், நகையை கொள்ளையடித்துள்ளார்.

இந்த கொள்ளை சம்பவத்திற்கு நர்சின் கணவர் நரேஷ் குமார் சாஹர் என்பவரும் உடந்தையாக இருந்துள்ளார். இதனையடுத்து, நடிகை சோனம் கபூர் வீட்டில் கொள்ளையடித்த நர்ஸ், கணவர் கைது செய்யப்பட்டுள்ளனர். கைது செய்யப்பட்ட நர்சிடம் இருந்து கொள்ளையடித்த நகை, பணத்தை மீட்கும் முயற்சியில் போலீசார் ஈடுபட்டுள்ளனர்.

சோனம் கபூரின் மாமியார் உடல்நிலையை கவனிக்க வந்த நர்ஸ் வீட்டில் இருந்த 2.40 கோடி ரூபாய் மதிப்புள்ள நகை, பணத்தை கொள்ளையடித்த சம்பவம் அதிர்ச்சியை ஏற்படுத்தியுள்ளது.