தொடர் தோல்வி படங்களால் நஷ்டம்: ஈடு செய்யுமா 'தி ராஜா சாப்'? - தயாரிப்பாளர் பதில்

சென்னை,

பிரபல தயாரிப்பாளர் டிஜி விஸ்வ பிரசாத். இவர் தனது பீப்பிள் மீடியா பேக்டரி என்ற தயாரிப்பு நிறுவனத்தின் மூலம் ஒவ்வொரு வருடமும் பல படங்களை தயாரித்து வருகிறார். மேலும், 100க்கும் மேற்பட்ட படங்களை தயாரிக்கவும் திட்டமிட்டுள்ளார். ஆனால், இவருக்கு வெற்றி விகிதம் மிகவும் குறைவாகவே உள்ளது.

கடந்த 2022-ம் ஆண்டு வெளியான"தமாகா" படத்திற்குப் பிறகு, அவரது தயாரிப்பில் வெளியான படங்கள் எதுவும் அவருக்கு லாபத்தைத் தரவில்லை. "ராமபாணம்," "கழுகு", "மனமே" மற்றும் "திரு. பச்சன்" ஆகிய படங்கள் தோல்வியடைந்தன. இதனால், தயாரிப்பு நிறுவனம் நஷ்டத்தை கண்டது.

தற்போது, பிரபாஸ் நடிப்பில் உருவாகி வரும் 'தி ராஜா சாப்' படத்தை இந்நிறுவனம் தயாரித்து வருகிறது. இந்நிலையில், நஷ்டத்தை எப்படி மீட்பது என்ற கேள்விக்கு டிஜி விஸ்வ பிரசாத் பதிலளித்துள்ளார். இது குறித்து அவர் கூறுகையில்,

''தி ராஜா சாப்' அனைத்தையும் ஈடு செய்யும். இப்படம் மிகப்பெரிய பிளாக்பஸ்டராக இருக்கும். இதில் இருந்து கிடைக்கும் லாபம் இதுவரை எங்களுக்கு ஏற்பட்ட இழப்புகள் அனைத்தையும் ஈடுகட்ட உதவும்' என்றார்.

'கல்கி 2898 ஏடி' படத்தை தொடர்ந்து, பிரபாஸ் கதாநாயகனாக நடிக்கும் இப்படத்தை மாருதி இயக்குகிறார். பிரபாஷுடன், நிதி அகர்வால் மற்றும் மாளவிகா மோகனன் முக்கிய கதாபாத்திரங்களில் நடித்து வருகின்றனர்.