வலுவிழக்கும் காற்றழுத்த தாழ்வு மண்டலம்

புதுடெல்லி,

ஆந்திரா கடற்கரையில் மேற்கு மத்திய வங்கக்கடலில் ஏற்பட்ட காற்றழுத்த தாழ்வு நிலை கடந்த 6 மணி நேரத்தில் மணிக்கு 12 கிமீ வேகத்தில் கிழக்கு-வடகிழக்கு திசையில் நகர்ந்து மேற்கு மத்திய வங்காள விரிகுடாவில் மையம் கொண்டிருந்தது.

இது விசாகப்பட்டினத்திலிருந்து தென்-தென்கிழக்கே சுமார் 430 கி.மீ (ஆந்திரப் பிரதேசம்) தொலைவிலும், சென்னைக்கு (தமிழ்நாடு) கிழக்கு-வடகிழக்கே 480 கி.மீ. தொலைவிலும் மற்றும் கோபால்பூருக்கு (ஒடிசா) தெற்கே 590 கி.மீ. தொலைவிலும் மையம் கொண்டுள்ளது.

இந்த அமைப்பு மெதுவாக கிழக்கு-வடகிழக்கு நோக்கி நகர்ந்து அடுத்த 12 மணிநேரத்திற்கு காற்றழுத்த தாழ்வு மண்டலமாக அதன் தீவிரத்தை தக்கவைத்து, அதன்பிறகு கடலில் படிப்படியாக வலுவிழக்க வாய்ப்புள்ளது என்று இந்திய வானிலை ஆய்வு மையம் தெரிவித்துள்ளது. 

முன்னதாக இந்த காற்றழுத்த தாழ்வு மண்டலம் இன்றோ அல்லது நாளையோ வலுவிழந்து காற்றழுத்த தாழ்வு பகுதியாக வறண்ட காற்று உதவியுடன் மீண்டும் தமிழக பகுதிகளை ஓரிரு நாட்களில் அடையக்கூடும் என வானிலை ஆய்வாளர்கள் தெரிவித்திருந்தனர்.

இதன்மூலம் தமிழக பகுதிகளில் பரவலாக வருகிற 24-ந் தேதிக்கு மேல் மிதமான மழைக்கு வாய்ப்பு இருப்பதாக கூறப்படுகிறது. அதன்பின்னர், இந்த தாழ்வு பகுதி வலுவிழந்து 26-ந் தேதிக்கு பிறகு வங்கக்கடலில் மேலும் ஒரு புதிய காற்றழுத்த தாழ்வு பகுதி உருவாவதற்கான சாத்தியமான சூழல் நிலவி வருவதாக தகவல் தெரிவிக்கப்பட்டுள்ளது.