ராமேஸ்வரம் கோவிலில் தங்க ரிஷப வாகனத்தில் எழுந்தருளிய சுவாமி-அம்பாள்

ராமேசுவரம்,

தமிழகம் முழுவதும் உள்ள அனைத்து கோவில்களிலும் நேற்று மார்கழி மாத அஷ்டமியை முன்னிட்டு சிறப்பு பூஜைகள் நடைபெற்றது. ராமேசுவரம் ராமநாதசாமி கோவிலிலும் மார்கழி மாத அஷ்டமியை முன்னிட்டு நேற்று காலை சிறப்பு பூஜை நடைபெற்றது.

இதையொட்டி நேற்று அதிகாலை 3 மணி அளவில் கோவில் நடை திறக்கப்பட்டது. 3.30 மணியில் இருந்து 4 மணி வரை ஸ்படிகலிங்க தரிசனம் நடைபெற்றது. தொடர்ந்து கால பூஜைகள் நடைபெற்ற பின்னர் காலை 7 மணி அளவில் சுவாமி-அம்பாள் தங்க ரிஷப வாகனத்தில் பஞ்சமூர்த்திகளுடன் கோவிலில் இருந்து எழுந்தருளினர்.

தொடர்ந்து கோவிலின் கிழக்கு வாசல், தெற்கு ரதவீதி சாலை, மார்க்கெட் தெரு வழியாக திட்டக்குடி சந்திப்பு சாலை, ராம தீர்த்தம், சீதாதீர்த்தம் வரை வந்த சுவாமி-அம்பாள் பின்னர் காமராஜ் நகர் சாலை, அக்னி தீர்த்த கடற்கரை உள்ளிட்ட நகரின் பல முக்கிய வீதிகளில் வீதி உலா சென்று மீண்டும் கோவிலுக்கு பகல் 12.30 மணிக்கு வந்தடைந்தது. நகரின் அனைத்து பகுதிகளுக்கும் சுவாமி-அம்பாள் வந்தபோது ஏராளமான பக்தர்கள் மாலை அணிவித்தும், தேங்காய் உடைத்தும் தரிசனம் செய்தனர்.

ஆண்டுதோறும் மார்கழி மாத அஷ்டமி பிரதட்சணை அன்று ஒரு நாள் மட்டுமே சுவாமி-அம்பாள் கோவிலில் இருந்து நேரடியாக எழுந்தருளி வீதி உலா வந்து பக்தர்களுக்கு படி அளப்பதாக ஐதீகம். அதுபோல் மார்கழி மாத அஷ்டமி பிரதட்சணையை முன்னிட்டு நேற்று காலை சுவாமி-அம்பாள் வீதி உலா நிகழ்ச்சி நடைபெற்றதை தொடர்ந்து 7 மணி முதல் பகல் 12.30 மணி வரை பக்தர்கள் தரிசனம் செய்யவும், தீர்த்தம் நீராடவும் அனுமதிக்கப்படவில்லை.