கம்பு இனிப்பு ரொட்டி
சிறுதானிய வகையை சேர்ந்த கம்புவை பயன்படுத்தி இனிப்பு ரொட்டி, கம்பு பால்ஸ் தயாரிப்பது குறித்து பார்ப்போம்.
கம்பு இனிப்பு ரொட்டி
தேவையான பொருட்கள்:
கம்பு - 2 கப்
வெல்லம் - ½ கப்
தேங்காய்த் துருவல் - ¼ கப்
முந்திரி (பொடிதாக நறுக்கியது) - ¼ கப்
வெந்நீர் - தேவைக்கு ஏற்ப
உப்பு - ஒரு சிட்டிகை
நெய் - தேவைக்கு
ஏலக்காய் பொடி - ¼ டீஸ்பூன்
வாழை இலை - 1
செய்முறை:
கம்பை சுத்தப்படுத்தி 10 நிமிடங்கள் தண்ணீரில் ஊறவைக்கவும். பிறகு தண்ணீரை வடிகட்டி ஈரம் போகும் வரை நிழலில் உலர்த்தவும். பின்பு பொடியாக திரித்துக் கொள்ளவும். அந்த மாவை நன்றாக சலித்து எடுக்கவும் அகலமான பாத்திரத்தில் கம்பு மாவைக் கொட்டி அதனுடன் தேங்காய்த்துருவல், ஏலக்காய் பொடி, நறுக்கிய முந்திரிசேர்த்துக் கலக்கவும். சிறிதளவு தண்ணீரில்உப்பைக் கரைத்து மாவில் தெளித்து மீண்டும்கிளறவும்.
மற்றொரு பாத்திரத்தில் வெல்லத்தைப் போட்டு சிறிது தண்ணீர் ஊற்றி அடுப்பில் வைத்து மிதமான தீயில் சூடுபடுத்தவும். வெல்லம் கரைந்ததும் வடிகட்டி மாவில் ஊற்றி கலந்து சப்பாத்தி மாவுபதத்துக்கு தயார் செய்யவும் இப்போது மாவை சப்பாத்தியின் அளவுக்கேற்ப உருண்டையாக உருட்டி வைக்கவும்.
வாழை இலையில் சிறிது நெய் தடவி ஒவ்வொரு உருண்டையையும் எடுத்து ரொட்டியாகத் தட்டவும் அதை தோசைக் கல்லில் போட்டு தேவையான அளவு நெய் ஊற்றி இருபுறமும் சிவக்க சுட்டு எடுக்கவும்.
குறிப்பு: வெல்லக் கரைசலும், கம்பு மாவும் நன்றாகக் கலந்தால் மட்டுமே ரொட்டியில் இனிப்பு சரியாக இருக்கும். கம்பு மாவு முழுமையாக வேக சிறிது நேரம் ஆகும் என்பதால் நிதானமாக சுட்டு எடுக்க வேண்டும்.
கம்பு பால்ஸ்
தேவையான பொருட்கள்:
கம்பு மாவு - 1 கப்
வெல்லம் (நன்றாக பொடித்தது) - ½ கப்
நெய் - ¼ கப்
முந்திரி, திராட்சை, பாதாம் (பொடிதாக
நறுக்கியது) - ½ கப்
ஏலக்காய் பொடி - ¼ டீஸ்பூன்
செய்முறை:
நான்-ஸ்டிக் பாத்திரத்தை அடுப்பில் வைத்து அதில் நெய் ஊற்றி சூடுபடுத்தவும்.
பின்னர் அதில் கம்பு மாவைக் கொட்டி மிதமான தீயில் பொன்னிறமாக வறுக்கவும்.
கம்பு மாவு, நெய்யுடன் சேர்ந்து வாசனை வரத்தொடங்கியதும் ஏலக்காய் பொடி, முந்திரி, திராட்சை, பாதாம் ஆகியவற்றை கொட்டிக் கிளறவும். கலவை வறண்டு இருந்தால், மேலும் சிறிது நெய் ஊற்றிக் கிளறி அடுப்பை அணைக்கவும்.
இப்போது அதில் வெல்லத்தை சேர்த்து நன்றாகக் கலக்கவும்.
இந்தக் கலவையை நெய் தடவிய பாத்திரத்தில் கொட்டி ஆற வைக்கவும். கை பொறுக்கும் சூட்டில் இருக்கும்போது சிறு சிறு உருண்டைகளாக பிடிக்கவும்.
காற்றுப் புகாத டப்பாக்களில் சேமித்து வைத்தால் ஒரு வாரம் வரை நீடிக்கும்.