'சூர்யா 45' படத்தில் கேமியோ ரோலில் விஜய்சேதுபதி

சென்னை,

தென்னிந்திய திரையுலகில் முன்னணி நடிகராக இருப்பவர் சூர்யா. இவரது நடிப்பில் சிறுத்தை சிவா இயக்கத்தில் கடந்த 14-ந் தேதி 'கங்குவா' படம் வெளியானது. இப்படம் கலவையான விமர்சனங்களை பெற்று வருகிறது. அதனை தொடர்ந்து கார்த்திக் சுப்புராஜ் இயக்கத்தில் சூர்யா 44-வது திரைப்படத்தில் நடித்து முடித்துள்ளார். இப்படம் விரைவில் வெளியாக உள்ளது.

தற்போது ஆர்.ஜே. பாலாஜி இயக்கத்தில் தனது 45-வது படத்தில் நடித்து வருகிறார். இந்த படத்திற்கு தற்காலிகமாக 'சூர்யா 45' என்று பெயரிடப்பட்டுள்ளது. இந்த படத்தினை டிரீம் வாரியர் பிக்சர்ஸ் நிறுவனம் தயாரிக்கிறது. சமீபத்தில் இந்த படத்தின் போஸ்டர் வெளியாகி வைரலானது. இப்படத்தின் ஒளிப்பதிவை ஜிகே விஷ்ணு மேற்கொள்கிறார்.

இந்த படத்தில் திரிஷா ஒரு முக்கிய கதாபாத்திரத்தில் நடிக்கிறார். சூர்யாவும் திரிஷாவும் இணைந்து மவுனம் பேசியதே, ஆறு ஆகிய படங்களில் இணைந்து நடித்துள்ளனர். 19 வருடங்கள் இடைவெளிக்கு பிறகு இவர் மீண்டும் இணைந்து நடிப்பது ரசிகர்களிடையே எதிர்பார்ப்பை அதிகப்படுத்தியுள்ளது. மேலும் இந்த படத்தில் காளி வெங்கட், ஸ்வாசிகா, மலையாள நடிகர் இந்திரன்ஸ் ஆகியோர் நடிக்கின்றனர்.

இதற்கிடையில், இப்படத்தின் முதற்கட்ட படப்பிடிப்பு பணிகள் கோவையில் பூஜையுடன் தொடங்கி, விறுவிறுப்பாக நடைபெற்று வருகிறது. இந்த நிலையில், இப்படத்தில் விஜய் சேதுபதி கேமியோ ரோலில் நடிப்பதற்காக படக்குழு அவரிடம் பேச்சு வார்த்தை நடத்தி உள்ளதாக கூறப்படுகிறது. அவரின் பதிலுக்காக காத்துக் கொண்டுள்ளனர். விஜய் சேதுபதி இப்படத்தில் நடிக்க ஒப்புக்கொண்டால் படத்தின் மீதான எதிர்பார்ப்பு மேலும் அதிகரித்துவிடும் என்பது குறிப்பிடத்தக்கது. விரைவில் அதிகாரபூர்வ அறிவிப்பு வெளியாகும் என்று எதிர்பார்க்கப்படுகிறது.