ஒரே நாளில் திரைக்கு வரும் 6 படங்கள்

சென்னை,

ஒவ்வொரு வாரமும் திரையரங்குகளில் பல்வேறு திரைப்படங்கள் வெளியாகி வருகின்றன. அந்தவகையில் வருகிற 22-ந் தேதி திரையரங்குகளில் வெளியாகவுள்ள திரைப்படங்கள் குறித்த தகவலை இந்த செய்தி தொகுப்பில் காணலாம்.

ஜாலியோ ஜிம்கானா

சக்தி சிதம்பரம் இயக்கத்தில் பிரபுதேவா நடிப்பில் உருவாகி உள்ள படம் 'ஜாலியோ ஜிம்கானா'. இதில் கதாநாயகியாக மடோனா செபாஸ்டியன் நடித்துள்ளார். மேலும் திரைப்படத்தில் யாஷிகா ஆனந்த், கிங்ஸ்லி, யோகிபாபு, அபிராமி, ஒய்.ஜி மகேந்திரன் உள்ளிட்டோரும் நடித்துள்ளனர். மிகவும் வித்தியாசமான கதைக்களத்தில் இப்படம் உருவாகியுள்ளது. இந்த படத்தின் பர்ஸ்ட் லுக் மற்றும் டிரெய்லர் வெளியாகி ரசிகர்கள் மத்தியில் நல்ல வரவேற்பை பெற்று வரும் நிலையில், படத்தின் மீதான எதிர்ப்பார்ப்பும் கூடியுள்ளது.

எமக்கு தொழில் ரொமான்ஸ்

அசோக் செல்வன் நடிப்பில் உருவாகியுள்ள திரைப்படம் 'எமக்குத் தொழில் ரொமான்ஸ்'. இந்தப் படத்தை அறிமுக இயக்குனர் பாலாஜி கேசவன் இயக்கியுள்ளார். அவந்திகா மிஸ்ரா நாயகியாக நடித்துள்ள இந்த படத்தில் எம்.எஸ்.பாஸ்கர், ஊர்வசி, அழகம்பெருமாள், பகவதி பெருமாள், விஜய் வரதராஜ், படவா கோபி உள்ளிட்ட பலர் நடித்துள்ளனர். ரொமான்ஸ் பொங்கி வழியும் ஒரு இளைஞனின் காதல், அதனால் ஏற்படும் பிரச்சினைகள், அவனுக்கு உதவும் குடும்பம், நண்பர்கள் என ரொமான்ஸ் காமெடி திரைப்படமாக இந்த படம் உருவாகியுள்ளது.

நிறங்கள் மூன்று

'துருவங்கள் பதினாறு' படத்தின் மூலம் கவனம் பெற்ற இயக்குனர் கார்த்திக் நரேன் இயக்கத்தில் உருவாகியுள்ள திரைப்படம் 'நிறங்கள் மூன்று'. இந்த படத்தில் நடிகர் அதர்வா முரளி, சரத்குமார், ரகுமான் ஆகியோர் முக்கிய கதாபாத்திரங்களில் நடித்துள்ளனர். ஹைப்பர்லிங்க் திரில்லர் கதையம்சம் கொண்டதிரைப்படமாக இந்த படம் உருவாகி உள்ளது. இந்த படத்துக்கு இசையமைப்பாளர் ஜேக்ஸ் பிஜோய் இசையமைத்துள்ளார். இந்த படத்தின் டிரைலர் வெளியாகி ரசிகர்கள் மத்தியில் நல்ல வரவேற்பை பெற்றது குறிப்பிடத்தக்கது.

பராரி

ஹரிஷங்கர், சங்கீதா கல்யாண் நடிப்பில் எழில் பெரியவேடி இயக்கத்தில் உருவாகியுள்ள படம் 'பராரி' . 'ஜோக்கர்', 'ஜிப்ஸி', 'ஜப்பான்' போன்ற பல படங்களை இயக்கிய ராஜு முருகனின், உதவியாளர் எழில் பெரியவேடி இப்படத்தை இயக்கியுள்ளார். இப்படத்திற்கு ஷேன் ரோல்டன் இசையமைத்துள்ளார். ஒடுக்கப்பட்ட மக்களின் வாழ்வியலை கண் முன் நிறுத்தும் விதத்தில் இப்படம் உருவாகி உள்ளது.

தூவல்

ராஜவேல் கிருஷ்ணா இயக்கத்தில் புதுமுக நடிகர்களை வைத்து உருவாகி உள்ள படம் 'தூவல்'. இதுவரை திரையில் சொல்லப்படாத கதைகளத்தில் இப்படம் எடுக்கப்பட்டுள்ளது. சிங்கர் பிக்சர்ஸ் நிறுவனம் சார்பில், இந்த படத்தை கமலா குமாரி தயாரித்துள்ளார். இதுவரை சுமார் 40-க்கும் மேற்பட்ட விருதுகளை வென்று குவித்துள்ள இந்த திரைப்படம், அருவிகளில் மீன் பிடித்து வாழ்வாதாரத்தை நடத்தும் அடிப்படை மக்களின் வாழ்வியலை காட்டும் படமாக உருவாகி உள்ளது.

குப்பன்

காதல் மற்றும் நட்பு கதைக்களத்தில் சிறிய பட்ஜெட்டில் உருவாகியுள்ள படம் 'குப்பன்'. இந்த படத்தை இயக்குனர் சரண்ராஜ் எழுதி இயக்கியுள்ளார். இந்த படத்தை ஆதித்யா தயாரித்துள்ளார். அறிமுக நடிகர்களான தேவ் மற்றும் அதிராம் ஆகியோர் முன்னணி கதாபாத்திரங்களில் நடித்துள்ளனர். ஜனார்த்தன் ஒளிப்பதிவு செய்துள்ள இந்த படத்திற்கு, எஸ் ஜி இலை என்பவர் இசையமைத்துள்ளார்.