உறவினர்களை தாக்கிய வாலிபர் கைது

ஸ்பிக்நகர்:

தூத்துக்குடி அருகே உள்ள முத்தையாபுரம் பகுதியை சேர்ந்தவர் மாரியப்பன். இவரது மகன் முனியசாமி (வயது 36), முத்தையாபுரம் ராஜீவ் நகர் பகுதியை சேர்ந்த கலைச்செல்வன் மகன் மாரிமுத்து (34) ஆகியோர் முத்தையாபுரம் பஜார் பகுதியில் நின்று கொண்டிருந்தனர். அப்போது அங்கு வந்த அவர்களது உறவினரான முத்தையாபுரத்தை சேர்ந்த கருப்பசாமி மகன் சுடலைமணி (33) என்பவர் முனியசாமி, மாரிமுத்து ஆகியோரிடம் பேசிக் கொண்டிருந்தார். அப்போது அவர்களுக்குள் வாய்தகராறு ஏற்பட்டுள்ளது.

இதில் ஆத்திரமடைந்த சுடலைமணி, 2 பேரையும் தாக்கி கொலை மிரட்டல் விடுத்ததாக கூறப்படுகிறது.

இதுகுறித்த புகாரின் பேரில் முத்தையாபுரம் போலீஸ் சப்- இன்ஸ்பெக்டர் சுந்தர் வழக்குபதிவு செய்து விசாரணை நடத்தி சுடலைமணியை கைது செய்தனர்.