கார் மோதியதில் தொழிலாளி சாவு

ராசிபுரம்

வாலிபர் சாவு

திருச்செங்கோடு அருகே உள்ள ஆண்டிபாளையம் குடித்தெரு பகுதியைச் சேர்ந்த செந்தில்ராஜா மகன் பரணிதரன் (வயது 22). இவர் திருச்செங்கோட்டில் ஜூஸ் கடையில் தொழிலாளியாக வேலை பார்த்து வந்தார். இந்தநிலையில் நேற்று முன்தினம் இரவு வீட்டில் இருந்து மோட்டார் சைக்கிளில் முள்ளுக்குறிச்சிக்கு சென்றார். இவரது உறவினர் வீட்டு நிகழ்ச்சிக்கு வாழை மரம் பார்த்து வர சென்றதாக கூறப்படுகிறது.

இவர் ராசிபுரம் ஆண்டகளூர்கேட் மெயின் ரோட்டில் கவுண்டம்பாளையம் அடுத்த கார் பட்டறை அருகே சென்று கொண்டிருந்தார். அப்போது ராசிபுரத்தில் இருந்து ஆண்டகளூர்கேட் நோக்கி எதிரே வந்த கார் பரணிதரன் சென்ற மோட்டார் சைக்கிள் மீது மோதியது. இதில் பரணிதரனுக்கு தலை, கால்களில் பலத்த காயம் ஏற்பட்டது. அந்த வழியாக வந்தவர்கள் உடனடியாக அவரை மீட்டு சிகிச்சைக்காக ராசிபுரம் அரசு ஆஸ்பத்திரியில் கொண்டு போய் சேர்த்தனர். அங்கு அவரை பரிசோதித்த டாக்டர்கள் ஏற்கனவே பரணிதரன் இறந்து விட்டதாக தெரிவித்தனர்.

2 பேர் காயம்

இந்தநிலையில் மோட்டார் சைக்கிள் மீது மோதிய கார் முன்னால் சென்ற மொபட் மீதும் கார் மோதியதாக கூறப்படுகிறது. இதில் கவுண்டம்பாளையத்தைச் சேர்ந்த கருப்பண்ணன் (53), இவரது உறவினர் பிரபு (32) ஆகியோர் காயமடைந்தனர். இவர்கள் இருவரும் ராசிபுரம் அரசு ஆஸ்பத்திரியில் சிகிச்சை பெற்றனர்.

இந்த விபத்து குறித்து ராசிபுரம் சிறப்பு சப்-இன்ஸ்பெக்டர் கண்ணன் வழக்குப்பதிவு செய்து விசாரணை நடத்தி வருகிறார். ராசிபுரம் அருகே மோட்டார் சைக்கிள் மீது கார் மோதியதில் வாலிபர் இறந்த சம்பவம் அந்த பகுதியில் சோகத்தை ஏற்படுத்தி உள்ளது.