ஆட்டோ மீது லாரி கவிழ்ந்து விபத்து - 5 பேர் படுகாயம்

குமரி மாவட்டம், இரணியல் அருகே கண்டன்விளை பகுதியை சேர்ந்தவர் பிரேம்நாத் ( வயது 40). ஆட்டோ டிரைவர். இவர் இன்று காலை ஆட்டோவில் அவரது அண்ணன் மனைவி சரோஜா,மற்றும் குழந்தைகள் தானிகா (13), ஆலினா ஜெருஷா (7) ,மெஸ்ஸி (9) ஆகியோரை அழைத்துக் கொண்டு மடவிளாகம் பகுதியில் சென்று கொண்டிருந்தார்.

அப்போது கண்டன்விளை அருகே சிமெண்ட் கலவை ஏற்றிக் கொண்டு லாரி ஒன்று வந்து கொண்டிருந்தது . தீடிரென டிரைவரின் கட்டுப்பாட்டை இழந்த லாரி எதிர்பாராத விதமாக ரோட்டில் கவிழ்ந்ததில் அருகில் நின்ற ஆட்டோ மீது விழுந்தது. இதில் ஆட்டோவில் இருந்தவர்கள் பலத்த காயம் அடைந்தனர்.

தகவல் அறிந்து வந்த தீயணைப்பு படை வீரர்கள் அருகிலிருந்தவர்கள் உதவியுடன் ஆட்டோவில் இருந்தவர்களையும் ,லாரி டிரைவர் மற்றும் கிளினரையும் மீட்டு ஆம்புலன்ஸ் மூலம் ஆசாரிப்பள்ளம் அரசு மருத்துவக்கல்லூரி மருத்துவமனைக்கு அனுப்பி வைத்தனர். அதிர்ஷ்டவசமாக இந்த விபத்தில் உயிரிழப்பு எதுவும் ஏற்படவில்லை. விபத்து குறித்து தகவல் அறிந்து வந்த இரணியல் போலீசார் விசாரணை நடத்தி வருகின்றனர்.