பிரபல நகைக்கடையில் 23 பவுன் திருட்டு

பிரபல நகைக்கடை

சேலம் அழகாபுரத்தில் பிரபல நகைக்கடை செயல்பட்டு வருகிறது. இதன் உதவி மேலாளரான சந்திரசேகர் (வயது 39) அழகாபுரம் குற்றப்பிரிவு போலீசில் புகார் மனு ஒன்று கொடுத்துள்ளார். அந்த மனுவில், எங்களது கடையில் பல்வேறு மாடல்களில் தங்க நகைகள் விற்பனைக்கு வைத்து உள்ளோம். இதில் 23 பவுன் நகைகள் திருட்டு போய் உள்ளது. இதுதொடர்பாக கடையில் வேலை பார்க்கும் ஒருவர் மீது சந்தேகம் உள்ளது. எனவே திருட்டு போன நகைகளை கண்டுபிடித்து தர வேண்டும். இவ்வாறு அந்த புகார் மனுவில் கூறியுள்ளார்.

விசாரணை

புகாரின் பேரில் போலீசார் வழக்குப்பதிவு செய்தனர். கடையின் உதவி மேலாளர் புகார் கூறியுள்ள விற்பனையாளரிடம் போலீசார் விசாரணை நடத்தி வருகின்றனர். அதாவது, கடையில் அனைத்து இடங்களும் கேமராவால் கண்காணிக்கப்பட்டு வருகிறது. அப்படி இருந்தும் அந்த விற்பனையாளர் சாதுர்யமாக நகைகளை திருடியுள்ளார். அவரிடம் விசாரணை முடிவடையும் போது, நகைகளை எப்படி திருடினார் என்ற விவரம் தெரிய வரும் என்று போலீசார் கூறினர். பிரபல நகைக்கடையில் விற்பனையாளரே நகைகளை திருடியுள்ள சம்பவம் பரபரப்பை ஏற்படுத்தி உள்ளது.