நீர்வரத்து குறைந்ததால் மேட்டூர் அணையின் நீர்மட்டம் சரிவு

சேலம்,

சேலம் மாவட்டத்தில் உள்ள மேட்டூர் அணையின் நீர்ப்பிடிப்பு பகுதிகளில் பெய்த தொடர்மழை காரணமாக அணைக்கு வரும் நீர்வரத்து அதிகரித்துள்ளது. இதனால் அணையின் நீர்மட்டம் உயர்ந்ததைத் தொடர்ந்து, கடந்த மே 24-ந் தேதி காவிரி டெல்டா பாசனத்தில் குறுவை சாகுபடிக்காக முதல்-அமைச்சர் மு.க.ஸ்டாலின் தண்ணீரை திறந்து வைத்தார்.

இந்த நிலையில், மேட்டூர் அணைக்கு நேற்று காலை 17,923 கன அடியாக இருந்த நீர்வரத்து இன்று மேலும் சரிந்து 9,272 கன அடியாக வந்து கொண்டிருக்கிறது. அணையில் இருந்து காவிரியில் குறுவை சாகுபடிக்கு 8 ஆயிரம் கன அடி தண்ணீர் திறக்கப்பட்டு வந்த நிலையில், இன்று நீர்திறப்பு 12 ஆயிரம் கன அடியாக அதிகரிக்கப்பட்டுள்ளது.

அணைக்கு வரும் தண்ணீரை விட அணையில் அதிக அளவு தண்ணீர் திறந்து விடப்படுவதால் அணை நீர்மட்டம் குறையத் தொடங்கி உள்ளது. நேற்று 115.30 அடியாக இருந்த மேட்டூர் அணை நீர்மட்டம் இன்று 115.22 அடியாக சரிந்துள்ளது குறிப்பிடத்தக்கது.