வாகனம் மோதி குளிர்பான கடை உரிமையாளர் பலி

சங்கராபுரம் அருகே எஸ்.வி.பாளையம் கிராமத்தை சேர்ந்தவர் ராஜா மகன் மணிகண்டன் (வயது 33). கள்ளக்குறிச்சியில் குளிர்பான கடை நடத்தி வந்தார். இவர் நேற்று முன்தினம் வீட்டில் இருந்து தனது மோட்டார் சைக்கிளில் கடைக்கு புறப்பட்டார். அரியபெருமானூர் சக்தி விநாயகா மரப்பட்டறை அருகில் சென்றபோது அந்த வழியாக வந்த அடையாளம் தெரியாத வாகனம் அவர் மீது மோதிவிட்டு நிற்காமல் சென்றுவிட்டது. இந்த விபத்தில் பலத்த காயமடைந்த மணிகண்டன் சிகிச்சைக்காக கள்ளக்குறிச்சி அரசு மருத்துவக்கல்லூரி மருத்துவமனையில் அனுமதிக்கப்பட்டார். அங்கு டாக்டர்கள் தீவிர சிகிச்சை அளித்தும் பலனின்றி அவர் பரிதாபமாக இறந்தார். இது குறித்து மணிகண்டனின் மனைவி பிரியதர்ஷினி கொடுத்த புகாரின் பேரில் கள்ளக்குறிச்சி போலீசார் வழக்குப்பதிவு செய்து விபத்துக்கு காரணமாக வாகன ஓட்டி யார்? என்பது பற்றி விசாரணை நடத்தி வருகின்றனர்.