மாணவியின் மரணத்தை கூட எடப்பாடி பழனிசாமி அரசியலாக்குகிறார் -அமைச்சர் எ.வ.வேலு

சென்னை,

தமிழக பொதுப்பணித்துறை அமைச்சரும், கள்ளக்குறிச்சி மாவட்ட பொறுப்பு அமைச்சருமான எ.வ.வேலு வெளியிட்டுள்ள அறிக்கையில் கூறியிருப்பதாவது:-

'கள்ளக்குறிச்சி தனியார் பள்ளி மாணவி ஸ்ரீமதி மரணத்துக்கு நீதி கேட்டு 3 நாட்களாக போராடியும் எந்த நடவடிக்கையும் எடுக்கவில்லை' என்று சட்டமன்ற எதிர்க்கட்சி தலைவர் எடப்பாடி பழனிசாமி தெரிவித்துள்ளார். ஒரு மாணவியின் மரணத்தை கூட அரசியலாக்கி, தன் உள்கட்சி மோதலை திசைதிருப்ப அவர் இப்படி கூறியிருப்பதற்கு கடும் கண்டனத்தை தெரிவித்துக்கொள்கிறேன்.

ஸ்ரீமதி மரணத்தை பொறுத்தவரை, அந்த சம்பவம் வெளிவந்தவுடன் கள்ளக்குறிச்சி மாவட்ட கலெக்டரும், போலீஸ் சூப்பிரண்டும் நிலைமையை தொடர்ந்து கண்காணித்து வந்தார்கள். மாணவியின் பெற்றோருக்கு ஆறுதல் கூறியதுடன், போலீஸ் விசாரணை முடுக்கி விடப்பட்டிருந்தது.

மாணவி மரணம் குறித்த விசாரணை தீவிரமாக நடந்து வந்த வேளையில், பெற்றோர் தரப்பில் சி.பி.சி.ஐ.டி விசாரணை கோரி வழக்கு தொடரப்பட்டு, அந்த வழக்கு விசாரணை நாளை (இன்று) நடைபெற இருக்கிறது.

வசைபாடுவதே வாடிக்கையா?

இதற்கிடையில் பிள்ளையை இழந்த பெற்றோரின் குடும்பத்தை தொழிலாளர் நலத்துறை அமைச்சர் கணேசன் நேரில் சந்தித்து ஆறுதல் சொல்லி, மாணவியின் மரணம் குறித்த விசாரணை பாரபட்சமின்றி நடக்கும் என்று உறுதியும் அளித்துள்ளதை ஏனோ தன் கட்சியில் இருக்கும் குழப்பத்தில் மறந்து விட்டு, எந்த பதவியில் நாம் இருக்கிறோம்? என்பது தெரியாத குழப்பத்தில் இருக்கும் எடப்பாடி பழனிசாமி, தி.மு.க. அரசின் மீது வசைபாடுவதை வாடிக்கையாக கொண்டுள்ளார்.

இதற்கிடையில் இன்றைய தினம் (நேற்று) அமைதியாக நடைபெற்ற போராட்டத்தில் வன்முறையை ஏற்படுத்த வேண்டும் என்று எங்கிருந்தோ தூண்டிவிடப்பட்டு வந்த சில விஷமிகள் இது போன்ற விரும்பத்தகாத நிகழ்வுகளில் ஈடுபட்டுள்ளார்கள். இதை அறிந்தவுடன் ஆஸ்பத்திரியில் சிகிச்சையில் இருக்கும் முதல்-அமைச்சர் மு.க.ஸ்டாலின், 'மக்கள் அமைதி காக்க வேண்டும்' என அறிக்கை வெளியிட்டு, தமிழ்நாடு காவல்துறை டி.ஜி.பி.யையும், உள்துறை செயலாளரையும் கள்ளக்குறிச்சிக்கு அனுப்பி, வன்முறையை உடனடியாக கட்டுக்குள் கொண்டு வந்து தற்போது அங்கே அமைதியை நிலை நாட்டியிருக்கிறார்.

முதல்-அமைச்சரை குறை சொல்வதா?

எடப்பாடி பழனிசாமி முதல்-அமைச்சராக இருந்தபோது காவல்துறை நிர்வாகம் எப்படியிருந்தது? என்றால், ஸ்டெர்லைட் போராட்டத்தில் 13 பேரை காக்கை குருவிகள் போல் சுட்டுக்கொன்று பல நாட்கள் அமைதி திரும்ப நடவடிக்கை எடுக்க முடியாமல் அரசே தோல்வியடைந்து ஸ்தம்பித்து நின்றது.

சாத்தான்குளம் காவல் நிலைய 'கஸ்டடி' மரணத்தில் காவல் நிலையத்தின் கட்டுப்பாட்டையே வருவாய் துறையின் கட்டுப்பாட்டில் கொண்டு செல்ல உயர்நீதிமன்றமே உத்தரவிட்ட சூழல் உருவாகி, தன் கீழ் இருந்த காவல் நிலையத்தின் நிர்வாகத்தையே கோட்டை விட்டு கோட்டையில் அமர்ந்திருந்தார் எடப்பாடி பழனிசாமி.

அ.தி.மு.க. ஆட்சியில், குறிப்பாக எடப்பாடி பழனிசாமியின் 4 ஆண்டு நிர்வாகத்தில் 'டபுள் டி.ஜி.பி.' போட்டு காவல்துறையையே சீரழித்த எடப்பாடி பழனிசாமிக்கு, இன்று தி.மு.க. ஆட்சியில் தலைநிமிர்ந்து நின்று சட்டத்தின் ஆட்சிக்கு உட்பட்டு மக்களை பாதுகாக்கும் பணியில் ஈடுபட்டுள்ள காவல்துறையினரையும், முதல்-அமைச்சரையும் குறை சொல்ல எந்த தார்மீக தகுதியும் இல்லை என்று தெரிவித்துக் கொள்கிறேன்.

குற்றவாளிகள் மீது கடும் நடவடிக்கை

கள்ளக்குறிச்சி மாணவி ஸ்ரீமதி மரணம் குறித்த விசாரணை முடிவில் தவறு யார் மீது இருந்தாலும் அவர்கள் மீது கடும் நடவடிக்கை எடுக்கப்படும் என்பதில் எந்த சந்தேகமும் வேண்டாம், யாருக்கும் வேண்டாம். குறிப்பாக எடப்பாடி பழனிசாமிக்கு ஒன்றை சொல்லிக் கொள்கிறேன். அமைதியாக நடைபெற்ற போராட்டத்தில் விஷமிகளை அனுப்பி இந்த வன்முறையை தூண்டிவிட்டவர்கள் யார்? என்பதையும் சேர்த்தே போலீஸ் விசாரித்து வருகிறது.

ஆகவே கலவரத்தில் ஈடுபட்டவர்கள், தூண்டி விட்டவர்கள் அனைவரும் சட்டத்தின் முன் நிறுத்தப்பட்டு, தக்க தண்டனை பெற்றுக்கொடுக்கப்படும் என்பதோடு, மாணவி ஸ்ரீமதி மரணத்தில் நடைபெறும் சி.பி.சி.ஐ.டி விசாரணையின் அடிப்படையில் நிச்சயமாக கடும் நடவடிக்கை எடுக்கப்படும் என்று தெரிவித்துக்கொள்கிறேன்.

இவ்வாறு அவர் கூறியுள்ளார்.