உத்தமபாளையம் அருகே கார்-மோட்டார் சைக்கிள் மோதல்; முதியவர் பலி

உத்தமபாளையம் அருகே உள்ள அம்மாபட்டி மந்தையம்மன் கோவில் தெருவை சேர்ந்தவர் ராஜாங்கம் (வயது 65). இவரது பேரன் கவுதம் (14). இன்று மதியம் இவர்கள் இருவரும் அம்மாபட்டியில் இருந்து மோட்டார்சைக்கிளில் உத்தமபாளையத்திற்கு சென்றனர். பின்னர் உத்தமபாளையத்தில் இருந்து மோட்டார்சைக்கிளில் அம்மாபட்டிக்கு வந்து கொண்டிருந்தனர். அப்போது குரும்பபட்டி அருகே வந்த போது அந்த வழியாக வந்த கார், மோட்டாா்சைக்கிள் மீது மோதியது. இதில் தூக்கி வீசப்பட்டதில் ராஜாங்கம் சம்பவ இடத்திலேயே பரிதாபமாக இறந்தார். இதுகுறித்து தகவல் அறிந்த உத்தமபாளையம் போலீசார் சம்பவ இடத்திற்கு விரைந்து வந்தனர். பின்னர் ராஜாங்கம் உடலை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். மேலும் படுகாயமடைந்த கவுதமை மீட்டு சிகிச்சைக்காக தேனி அரசு மருத்துவ கல்லூரி மருத்துவமனைக்கு அனுப்பி வைத்தனர். இதுகுறித்து போலீசார் வழக்குப்பதிந்து காரை ஓட்டி வந்த பாலக்கோம்பையை சேர்ந்த மணிகண்டன் (55) என்பவரை கைது செய்தனர்.