பொன்னியின் செல்வன் திரைப்படம் எப்படி? ரசிகர்கள் கருத்து

'பொன்னியின் செல்வன்'

மணிரத்னம் இயக்கியுள்ள 'பொன்னியின் செல்வன்' திரைப்படத்தின் முதல் பாகம் உலகம் முழுவதும் கடந்த 30-ந் தேதி வெளியானது. மிகப்பெரிய நட்சத்திர பட்டாளமே நடித்துள்ள இந்த படம் தமிழ், தெலுங்கு, இந்தி, கன்னடம், மலையாளம் ஆகிய 5 மொழிகளில் ரிலீஸ் ஆனது. ரசிகர்களின் பெரும் எதிர்பார்ப்புக்கிடையே வெளியான இந்த படம் தமிழகத்தில் மட்டும் ரூ.25 கோடிக்கு மேல் வசூலை ஈட்டியிருக்கிறது. மேலும், ஒட்டுமொத்தமாக 'பொன்னியின் செல்வன்' உலக அளவில் ரூ.80 கோடி வசூல் செய்து உள்ளதாக கூறப்படுகிறது.

'பொன்னியின் செல்வன்' திரைப்படத்தை காண பெரம்பலூர்- அரியலூர் மாவட்டத்தை சேர்ந்த பொதுமக்கள் திரையரங்கை நோக்கி படையெடுத்து வருகின்றனர். இந்த திரைப்படம் குறித்து ரசிகர்கள் தெரிவித்த கருத்து விவரம் வருமாறு:-

சோழ சாம்ராஜ்ஜியம்

அருள்:- கரிகால சோழன், அருள்மொழி வர்மன், ராஜேந்திரன் ஆகியோர் கங்கை முதல் கடாரம் வரை படையெடுத்து வெற்றிபெற்ற கதைதான் பொன்னியின் செல்வன். சோழ சாம்ராஜ்ஜியத்தை பிரமாண்டமாக காட்டியுள்ளனர். அனைவரும் பார்க்க வேண்டிய ஒரு திரைப்படம்.

ஷியாம் வர்க்கீஸ்:- பொன்னியின் செல்வன் திரைப்படத்தில் விக்ரம், ஜெயம்ரவி, கார்த்திக், திரிஷா என அனைவரும் நன்றாக நடித்து இருந்தனர். படத்தில் இடம்பெற்ற அரண்மனை காட்சிகள், ராஜ உடைகள், இயற்கை எழில்கொஞ்சும் காடுகளை பார்க்கும்போது ஆயிரம் ஆண்டுகள் பின்னோக்கி சென்ற பிரமிப்பு ஏற்பட்டு உள்ளது.