குன்னூர் யங் ஸ்டார்ஸ் அணி வெற்றி

கோத்தகிரி, 

நீலகிரி மாவட்ட கிரிக்கெட் சங்கம் சார்பில், மாவட்ட அளவிலான ஏ, பி மற்றும் சி டிவிஷன் கிரிக்கெட் லீக் போட்டிகள் கோத்தகிரி காந்தி மைதானத்தில் நடைபெற்று வருகிறது. ஒவ்வொரு பிரிவிலும் தலா 10 அணிகள் மாவட்டம் முழுவதில் இருந்தும் பங்கேற்று விளையாடி வருகின்றன. இந்தநிலையில் ஏ டிவிஷன் பிரிவில் ஊட்டி புளூ மவுண்டன் வாரியர்ஸ் அணியும், குன்னூர் யங் ஸ்டார்ஸ் அணியும் மோதியது. 35 ஓவர்கள் கொண்ட போட்டியில் டாஸ் வென்று முதலில் பேட்டிங் செய்த ஊட்டி புளூ மவுண்டன் வாரியர்ஸ் அணி 34.4 ஓவர்களில் அனைத்து விக்கெட்டுகளையும் இழந்து 185 ரன்கள் எடுத்தது. இந்த அணி வீரர்கள் உதயகுமார் 48 ரன்கள், ரமேஷ் குமார் 39 ரன்கள், தீபக் 33 ரன்கள் எடுத்தனர். குன்னூர் யங் ஸ்டார்ஸ் அணியின் பந்து வீச்சாளர் யதுஷ்போஸ் 6 விக்கெட்டுகளை வீழ்த்தினார். இதனை தொடர்ந்து 210 பந்துகளில் 186 ரன்கள் எடுத்தால் வெற்றி என்ற இலக்குடன் ஆடிய குன்னூர் யங் ஸ்டார்ஸ் அணி 18.1 ஓவர்களில் 3 விக்கெட்டுகளை மட்டும் இழந்து வெற்றி இலக்கை எட்டியது. இந்த அணியின் வீரர்கள் யதுஷ் போஸ் 56 ரன்கள், அர்மான் மேத்யூஸ் மற்றும் அயான் மேத்யூஸ் தலா 38 ரன்கள் எடுத்தனர். 6 விக்கெட்டுகளை வீழ்த்தி, 56 ரன்கள் எடுத்த குன்னூர் யங் ஸ்டார்ஸ் அணி வீரர் யதுஷ் போஸ் சிறந்த ஆட்டக்காரராக தேர்வு செய்யப்பட்டார். இதன் மூலம் குன்னூர் யங் ஸ்டார்ஸ் அணி 7 விக்கெட் வித்தியாசத்தில் வெற்றி பெற்றது.