புகார் பெட்டி

கால்நடைகள் தொல்லை

சிவகங்கை மாவட்டம் காளையார்கோவில் சாலைகளிலேயே கால்நடைகள் அதிக அளவில் நடமாடுகின்றன. இதனால் வாகனஓட்டிகள் சாலையில் வாகனங்களை இயக்க முடியாமல் சிரமப்படுகிறார்கள். எனவே சம்பந்தப்பட்ட அதிகாரிகள் இங்கு சுற்றித்திரியும் கால்நடைகளை பிடித்து அப்புறப்படுத்த வேண்டும்.

பாலாஜி, காளையார்கோவில்.

போக்குவரத்து நெரிசல்

சிவகங்கை மாவட்டம் காரைக்குடியில் சாலைகளில் அடிக்கடி போக்குவரத்து நெரிசல் ஏற்படுகிறது. இதனால் சாலைகளில் பயணிக்கும் வாகனஓட்டிகள், பள்ளி மற்றும் கல்லூரி மாணவர்கள், வேலைக்கு செல்வோர் நேர தாமதத்தால் சிரமப்படுகிறார்கள். எனவே சம்பந்தப்பட்ட அதிகாரிகள் சாலைகளிலேயே ஏற்படும் வாகன நெரிசலை தடுக்க நடவடிக்கை எடுக்க வேண்டும்.

மனோகரன், காரைக்குடி.

கருவேல மரங்களை அகற்ற வேண்டும்

சிவகங்கை மாவட்டம் மானாமதுரை தாலுகா வேதியரேந்தல் தடுப்பணையில் இருந்து மேலநெட்டூர் கண்மாய்க்கு நீர் செல்ல முடியாமல் கருவேல மரங்கள் சூழ்ந்து காணப்படுகிறது. இதனால் இப்பகுதியில் நிலத்தடி நீர்மட்டம் குறைந்து வருகிறது. எனவே சம்பந்தப்பட்ட அதிகாரிகள் உரிய நடவடிக்கை எடுத்து கருவேல மரங்களை அகற்ற வேண்டும்.

பொதுமக்கள், மானாமதுரை.

மயான வசதி

சிவகங்கை மாவட்டம் தேவகோட்டை அருகே திருமணவயல் கிராமத்தில் ஏராளமான பொதுமக்கள் வசித்து வருகிறார்கள். இந்தப்பகுதி மக்களுக்கு இறந்தவர்களை அடக்கம் செய்ய மயான வசதி கிடையாது. இதனால் பல கிலோ மீட்டர் தூரம் சென்று இறந்தவர்களை அடக்கம் செய்து வருகிறார்கள். எனவே சம்பந்தப்பட்ட அதிகாரிகள் உரிய நடவடிக்கை எடுத்து இப்பகுதியில் மயானம் அமைத்து தர வேண்டும்.

பொதுமக்கள், திருமணவயல்.

பஸ் போக்குவரத்து தேவை

சிவகங்கை மாவட்டம் காரைக்குடியில் இருந்து திருச்சி செல்லும் பஸ்கள் பைபாஸ் சாலை வழியாகவே செல்கிறது. புதுவயல், கண்டனூர், கோட்டையூர் போன்ற பேரூராட்சிகளில் வசிக்கும் பயணிகள் பெரும்பாலும் காரைக்குடி வரை சென்று திருச்சி செல்லும் சூழ்நிலை உள்ளது.. இதனால் நேரம் மற்றும் காசு அதிகம் விரயமாகிறது. எனவே கோட்டையூர் வழியாக திருச்சிக்கு பஸ் போக்குவரத்து வசதி செய்து கொடுக்க வேண்டும்.

பிருந்தாவன், எழில் நகர், சிவகங்கை.